پاکستان سے امریکا جانے والے مسافروں کے لئے اہم خبر

پاکستان سے امریکا کے لیے براہ راست پروازیں دوبارہ شروع کرنے کے حوالے سے ایک اہم پیش رفت ہوئی ہے، یو ایس فیڈرل ایوی ایشن ایڈمنسٹریشن کی ایک ٹیم کل پاکستان پہنچنے والی ہے۔

میڈیا رپورٹ کے مطابق امریکا کے لیے پاکستان سے براہ راست پروازوں کے حوالے سے اہم پیش رفت ہوئی ہے، کئی سال بعد پہلی بار امریکی فیڈرل ایوی ایشن اتھارٹی ٹیم کل 6 ستمبر کو پاکستان پہنچے گی، پاکستان سول ایوی ایشن اتھارٹی نے امریکی فیڈرل ایوی ایشن اتھارٹی کی ٹیم کی آمد سے قبل آڈٹ کی تیاری مکمل کرلی ۔

یہ بھی پڑھیں : لگتا ہے روس اور بھارت اب ہمارے ساتھ نہیں رہے ، امریکی صدر ٹرمپ

ذرائع کا کہنا ہے کہ امریکی فیڈرل ایوی ایشن اتھارٹی ٹیم پاکستان سول ایوی ایشن اتھارٹی کا دورہ کرے گی ، پاکستان سول ایوی ایشن کے لائسنس امتحانات، فلائٹ اسٹینڈرڈ، ایئر وردی نیس سمیت اسٹیٹ سیفٹی شعبوں کا آڈٹ شامل ہیں۔

ذرائع کے مطابق ڈی جی سی اے اے کی ہدایت پر پاکستان سول ایوی ایشن اتھارٹی کے تمام شعبہ نے امریکی فیڈرل ایوی ایشن کے آڈٹ کی تیاری مکمل کرلی ہے۔

امریکی فیڈرل ایوی ایشن اتھارٹی ٹیم کا پاکستان پہنچا امریکا کے لیے پاکستان سے براہ راست پروازوں کی اجازت کی طرف اہم پیش رفت ہے، پی آئی اے سمیت تمام پاکستانی ایئرلائنز کو امریکا کے لیے براہ راست پروازوں کی بحالی کی امید ہے۔