وفاقی دارالحکومت اسلام آباد سمیت ملک کے مختلف حصوں میں آج پھر زلزلے کے شیدید جھٹکے محسوس کیے گئے۔
راولپنڈی، سمیت خیبر پختونخوا کے مختلف علاقوں میں زلزلے کے جھٹکے محسوس کیے گئے ، زلزلے کے باعث لوگ خوفزدہ ہو کر کلمہ طیبہ کا ورد کرتے ہوئے گھروں اور دفاتر سے باہر نکل آئے۔
زلزلے کی شدت زلزلہ پیما مرکز کے مطابق 5 اعشاریہ 2 ریکارڈ کی گئی جبکہ زیر زمین زلزلے کی گہرائی 20 کلو میٹر ریکارڈ کی گئی جب کہ اس کا مرکز افغانستان میں تھا۔
زلزلے سے تاحال کسی قسم کے جانی یا مالی نقصان کی کوئی اطلاع موصول نہیں ہوئی، مقامی انتظامیہ اور ریسکیو ادارے صورت حال پر نظر رکھے ہوئے ہیں اور کسی بھی ہنگامی صورتحال سے نمٹنے کے لئے تیار ہیں۔
خیال رہے کہ گزشتہ روز بھی اسلام آباد سمیت ملک کے مختلف شہروں میں 5اعشاریہ 9 شدت کا زلزلہ آیا تھا ۔
اس سے قبل بھی وفاقی دارالحکومت اسلام آباد اور پشاور سمیت ملک کے مختلف شہروں میں زلزلے کے جھٹکے محسوس کیے گئے تھے۔
واضح رہے کہ یکم ستمبر کی شب زلزلے کے باعث افغانستان میں 1400 سے زائد افراد جاں بحق اور سیکڑوں زخمی ہوگئے تھے۔
زلزلے کے جھٹکے کابل سے لے کر پاکستان کے دارالحکومت اسلام آباد تک محسوس کیے گئے تھے، کنڑ صوبے میں سب سے زیادہ تباہی ہوئی، جہاں سینکڑوں مکانات تباہ ہو گئے۔
طالبان حکومت کے ترجمان ذبیح اللہ مجاہد نے کابل میں پریس کانفرنس کرتے ہوئے بتایا تھا کہ طاقتور زلزلے کے نتیجے میں بیشتر جانی نقصان صوبہ کنڑ میں ہوا جب کہ صوبہ ننگرہار میں بھی جانی ومالی نقصان ہوا۔
By 
