پی ڈی ایم اے پنجاب نے آئندہ 24 گھنٹوں میں صوبے کے بیشتر اضلاع میں شدید طوفانی بارشوں کی پیشگوئی کی ہے۔ ترجمان پی ڈی ایم اے کے مطابق مون سون بارشوں کا دسویں اسپیل 9 ستمبر تک جاری رہے گا، جس کے دوران راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں۔
ترجمان نے مزید بتایا کہ نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا، میانوالی، ڈیرہ غازی خان، ملتان اور راجن پور میں بھی بارشوں کا امکان ہے۔ 9 ستمبر تک ڈیرہ غازی خان کی رودکوہیوں میں فلیش فلڈنگ کا خدشہ ظاہر کیا گیا ہے، جس پر صوبے بھر کے کمشنرز اور ڈپٹی کمشنرز کو الرٹ رہنے کی ہدایات جاری کر دی گئی ہیں۔
ڈی جی پی ڈی ایم اے عرفان علی کاٹھیا نے کہا ہے کہ دریائے چناب، راوی اور ستلج میں سیلابی صورتحال کا سامنا ہے، جبکہ بڑے شہروں میں مون سون بارشوں کے باعث ندی نالوں کے بپھرنے کا خدشہ ہے۔ انہوں نے بتایا کہ کمشنرز، ڈپٹی کمشنرز اور دیگر افسران الرٹ ہیں اور محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کر دیا گیا ہے۔
ڈی جی پی ڈی ایم اے پنجاب نے شہریوں سے اپیل کی ہے کہ خراب موسم میں احتیاطی تدابیر اختیار کریں، دریاؤں کے اطراف اکٹھے ہونے اور سیر و تفریح سے گریز کریں، آندھی اور طوفان کی صورتحال میں محفوظ مقامات پر رہیں اور کسی بھی ایمرجنسی کی صورت میں پی ڈی ایم اے ہیلپ لائن 1129 پر رابطہ کریں۔
By 
