اپنا گھر بنانے کے خواہشمند افراد کے لئے خوشخبری، حکومت کا بڑا اعلان

ترجمان محکمہ ہاؤسنگ کے مطابق پنجاب حکومت نے صوبے بھر میں 57 ہزار گھروں کی تعمیر کا منصوبہ تیار کر لیا ہے۔

یہ معیاری اور سستی رہائش گاہیں محکمہ ہاؤسنگ پنجاب کے زیر انتظام صوبے کے 21 اضلاع میں سرکاری زمینوں پر تعمیر کی جائیں گی۔

ترجمان نے بتایا کہ پہلے مرحلے میں 20 ہزار رہائش گاہوں کی تعمیر کے لیے 41 سائٹس کا انتخاب کیا گیا ہے۔ یہ مکانات مستحق افراد کو آسان اقساط پر فراہم کیے جائیں گے جبکہ منصوبہ پانچ سال میں مکمل ہوگا۔

ان کا مزید کہنا تھا کہ یہ رہائش گاہیں ورلڈ بینک اور پرائیویٹ سیکٹر کے اشتراک سے تعمیر کی جائیں گی۔ رہائشیوں کو ضروریاتِ زندگی کے مطابق تمام سہولیات فراہم کی جائیں گی جبکہ تعمیرات کے دوران معیار کی جانچ اور منصوبے کی باقاعدہ نگرانی بھی کی جائے گی۔

یہ بھی پڑھیں: اپنی چھت اپنا گھر منصوبہ کے تحت مستحق افراد کو کتنے لاکھ روپے بلا سود قرض ملے گا؟ تفصیلات سامنے آگئیں

ترجمان محکمہ ہاؤسنگ نے کہا کہ ماضی کے تجربات سے استفادہ کرتے ہوئے بہترین حکمت عملی کے تحت منصوبہ مکمل کیا جائے گا اور یہ منصوبہ صوبائی کابینہ کو منظوری کے لیے پیش کیا جائے گا۔