سعودی عرب اور ترکیہ کی خیبر پختونخوا میں دہشتگرد حملوں کی شدید مذمت، فوجی جوانوں کی شہادت پر پاکستان سے اظہارِ یکجہتی

سعودی عرب اور ترکیہ نے خیبر پختونخوا میں حالیہ دہشتگرد حملوں کی شدید الفاظ میں مذمت کرتے ہوئے پاکستانی فوجی جوانوں کی شہادت پر گہرے رنج و غم کا اظہار کیا ہے۔ دونوں ممالک نے پاکستان کے ساتھ مکمل یکجہتی اور دہشتگردی کے خلاف جنگ میں بھرپور حمایت کا اعادہ کیا۔

یہ بھی پڑھیں:بنوں سیکیورٹی فورسز کے بیس پر خود کش حملے میں 3 افغان شہری ملوث نکلے

سعودی وزارتِ خارجہ کی جانب سے جاری بیان میں پاکستانی فوجیوں کی شہادت پر گہرے دکھ اور افسوس کا اظہار کیا گیا۔ بیان میں دہشتگردی اور تشدد کی تمام اقسام کو مسترد کرتے ہوئے کہا گیا کہ سعودی عرب ان حملوں کی سخت مذمت کرتا ہے۔ مملکت نے شہدا کے اہل خانہ، حکومتِ پاکستان اور پاکستانی عوام سے تعزیت کا اظہار کیا اور مشکل کی اس گھڑی میں پاکستان کے ساتھ مکمل یکجہتی کا اعلان کیا۔

ترک وزارتِ خارجہ کی جانب سے بھی جاری بیان میں خیبر پختونخوا میں پیش آنے والے واقعات کو ’بزدلانہ دہشتگردی‘ قرار دیتے ہوئے شدید مذمت کی گئی۔ ترکیہ نے قیمتی جانوں کے ضیاع پر افسوس کا اظہار کیا اور پاکستان کے امن و استحکام کے لیے اپنی مکمل حمایت کا یقین دلایا۔ بیان میں مزید کہا گیا کہ ترکیہ اللہ تعالیٰ سے شہدا کے درجات کی بلندی کے لیے دعاگو ہے اور ہر قسم کے دہشتگردی کے خلاف پاکستان کے شانہ بشانہ کھڑا ہے۔

حالیہ آپریشنز میں 35 دہشتگرد ہلاک، 12 فوجی جوان شہید

سعودی عرب اور ترکیہ کی مذمت ایسے وقت میں سامنے آئی ہے جب خیبر پختونخوا میں 10 سے 13 ستمبر کے دوران پاکستانی سیکیورٹی فورسز نے متعدد انٹیلیجنس بیسڈ آپریشنز کے دوران بھارت کی پشت پناہی میں کالعدم تحریک طالبان پاکستان (ٹی ٹی پی) سے وابستہ 35 دہشتگردوں کو ہلاک کر دیا۔ ان آپریشنز میں پاکستان آرمی کے 12 جوان شہید ہوئے۔

مزید پڑھیں:خیبرپختونخوا میں 8 ماہ کے دوران 293 دہشت گرد ہلاک، 878 گرفتار، سی ٹی ڈی رپورٹ جاری

گزشتہ روز دیر کے علاقے لعل قلعہ میدان میں کیے گئے ایک اہم آپریشن کے دوران 10 دہشتگرد ہلاک ہوئے۔ آئی ایس پی آر کے مطابق یہ دہشتگرد بھارت کی مدد سے پاکستان میں کارروائیاں کر رہے تھے اور انہوں نے مقامی شہریوں کو یرغمال بنا رکھا تھا۔ سیکیورٹی فورسز نے بہادری سے لڑتے ہوئے شہریوں کو بازیاب کروایا، تاہم اس دوران پاک فوج کے 7 جوان ، جن میں 2 نائیکس، ایک لانس نائیک اور 4 سپاہی شامل تھے، جامِ شہادت نوش کر گئے۔ انٹیلیجنس رپورٹس کے مطابق حملے میں افغان باشندے بھی ملوث تھے۔

خیبر پختونخوا کے مختلف اضلاع میں آپریشنز

اس سے قبل، باجوڑ ضلع میں دہشتگردوں کی موجودگی کی اطلاع پر کیے گئے آپریشن میں سیکیورٹی فورسز نے 22 دہشتگردوں کو ہلاک کر دیا۔ ایک اور کارروائی جنوبی وزیرستان میں کی گئی، جہاں 13 مزید دہشتگرد مارے گئے۔ ان آپریشنز کے دوران مزید 5 فوجی جوان شہید ہوئے۔

فورسز نے دہشتگردوں کے ٹھکانوں سے اسلحہ اور گولہ بارود بھی برآمد کیا۔ یہ آپریشنز پاکستان آرمی کی دہشتگردی کے خاتمے اور ملکی سلامتی کے تحفظ کے لیے جاری قربانیوں کی عکاسی کرتے ہیں۔

پاکستان کے ساتھ علاقائی ممالک کی حمایت

سعودی عرب اور ترکیہ کی جانب سے اظہار یکجہتی اس بات کا ثبوت ہے کہ خطے کے ممالک دہشتگردی کے خلاف جنگ میں پاکستان کے کردار کو تسلیم کرتے ہیں۔ بین الاقوامی حمایت کے ساتھ، پاکستان دہشتگردی اور غیر ملکی سرپرستی میں ہونے والی کارروائیوں کا مؤثر انداز میں مقابلہ جاری رکھے گا۔