بجلی صارفین کے لئے خوشخبری: ماہ اگست کے بل معاف

وزیراعظم شہباز شریف نے اعلان کیا ہے کہ گھریلو بجلی صارفین کو اگست کے بجلی کے بل ادا نہیں کرنے پڑیں گے۔ انہوں نے کہا کہ یہ فیصلہ حالیہ شدید بارشوں اور سیلاب سے متاثرہ افراد کی مشکلات کم کرنے کے لیے کیا گیا ہے۔

 وزیراعظم نے ریلیف پیکج کا اعلان کرتے ہوئے کہا کہ بارشوں اور سیلاب کے باعث بڑے پیمانے پر جانی و مالی نقصان ہوا ہے، گھروں اور مال مویشیوں کو بھی شدید نقصان پہنچا ہے۔

انہوں نے بتایا کہ سیلاب زدہ علاقوں کے گھریلو صارفین کے اگست کے بل وفاقی حکومت اپنے وسائل سے ادا کرے گی۔ جو متاثرین پہلے ہی اگست کا بل ادا کر چکے ہیں، انہیں رقم واپس کی جائے گی۔ زرعی، کمرشل اور صنعتی صارفین کے نقصانات کا تخمینہ لگایا جا رہا ہے، جبکہ ان کے بجلی بلوں کی وصولی فی الحال موخر کر دی گئی ہے۔

یہ بھی پڑھیں: وفاقی حکومت کا سیلاب متاثرین کیلیے بجلی بلز میں بڑا ریلیف دینے کا فیصلہ

وزیراعظم کا کہنا تھا کہ یہ اقدام متاثرین پر کوئی احسان نہیں بلکہ ان کا حق ہے، بجلی تقسیم کار کمپنیوں کو اس حوالے سے ہدایات جاری کر دی گئی ہیں۔

انہوں نے مزید کہا کہ یہ ہماری معمولی سی کوشش ہے تاکہ متاثرین کی مشکلات میں کمی لائی جا سکے، تاہم حکومت متاثرہ علاقوں کی مکمل بحالی کے لیے پرعزم ہے۔ وزیراعظم نے عہد کیا کہ جب تک ہر متاثرہ شخص دوبارہ اپنے گھر آباد نہیں ہو جاتا، سکون سے نہیں بیٹھیں گے۔