اسرائیل نے قطر پر حملہ کر کے امن کی کوششوں کو سبوتاژ کیا، وزیراعظم شہباز شریف

وزیراعظم شہباز شریف نے کہا ہے کہ اسرائیل نے ثالث ہونے کے باوجود قطر پر حملہ کر کے اس کی خودمختاری کی خلاف ورزی کی اور امن کی کوششوں کو سبوتاژ کیا۔

دوحہ میں عرب اتحاد کے ہنگامی اجلاس سے خطاب میں وزیراعظم نے کہا کہ پاکستان دوحہ پر حملے کی کھلی مذمت کرتا ہے اور یہ حملہ مشرق وسطیٰ میں امن کی کوششوں کو سبوتاژ کرنے کے لیے کیا گیا۔ انہوں نے کہا کہ جنگ کے دوران امن کی بات کرنے اور ثالث کا کردار ادا کرنے کے باوجود بھی اسرائیل نے حملہ کیا، اس لیے پاکستان قطری حکام اور اپنے قطری بھائیوں کے ساتھ مکمل یکجہتی کا اظہار کرتا ہے۔

وزیراعظم نے بتایا کہ غزہ میں خون کی ندیاں بہہ رہی ہیں اور اس موقع پر انہوں نے ایک دس سالہ فلسطینی بچے کا ذکر بھی کیا جس نے خوراک کے لیے کئی کلومیٹر پیدل سفر کیا اور پھر اسے اسرائیلی فوج نے شہید کر دیا۔

شہباز شریف نے کہا کہ اسرائیل غزہ میں نسل کشی کر رہا ہے اور اس بربریت کو فوراً روکا جانا چاہیے۔ انہوں نے مطالبہ کیا کہ اسرائیل کو انسانیت کے خلاف جنگی جرائم پر احتساب کے کٹہرے میں لایا جائے اور بربریت روکنے کے لیے ایک عرب ٹاسک فورس تشکیل دی جائے اور اسرائیل کے خلاف فوری اقدامات کیے جائیں۔

وزیراعظم نے کہا کہ غزہ میں فوری طور پر جنگ بندی کروائی جائے اور فلسطینیوں کی رہائی اور مغویوں کی بازیابی کے لیے کوششیں کی جائیں۔ انہوں نے واضح کیا کہ غزہ کا معاملہ صرف دو ریاستی حل سے ہی ممکن ہے؛ فلسطین ایک علیحدہ ریاست ہو جس کا دارالحکومت القدس ہو اور ہم اسے تسلیم کرتے ہیں۔

وزیراعظم نے کہا کہ اسرائیلی جارحیت کو ہم مکمل طور پر مسترد اور مذمت کرتے ہیں اور اگر ہم متحد نہ ہوئے تو اسرائیل انسانیت کے خلاف اسی طرح اقدامات کرتا رہے گا۔