ڈونلڈ ٹرمپ کے قریبی ساتھی ’چارلی کرک‘ کے قاتل سے متعلق اہم شواہد منظرعام پرآگئے

امریکی صدر ڈونلڈ ٹرمپ کے قریبی ساتھی چارلی کرک کے قتل کے ملزم نے حملے سے پہلے دھمکیاں دیں، ڈی این اے شواہد سے جائے واردات سے تعلق ثابت ہو گیا، ایف بی آئی نے بھی تصدیق کر دی۔

وفاقی حکام نے 22 سالہ ٹائلر رابنسن کو قدامت پسند کارکن چارلی کرک کے قاتل کے طور پر شناخت کیا ہے اور بتایا ہے کہ اس نے حملے سے قبل کئی دھمکیاں دی تھیں، جبکہ جائے واردات سے ملنے والے ڈی این اے شواہد سے اس کا جرم سے تعلق ثابت ہوا ہے۔

ایف بی آئی کے ڈائریکٹر کاش پٹیل نے منگل کو تصدیق کی کہ رابنسن نے حملے سے پہلے واضح طور پر چارلی کرک کو نشانہ بنانے کا ارادہ ظاہر کیا تھا، جس میں ایک تحریری نوٹ بھی شامل تھا، جو اب تباہ ہو چکا ہے۔ جس میں اس نے لکھا تھا کہ اسے ’چارلی کرک کو ختم کرنے کا موقع‘ ملا ہے۔ پٹیل کے مطابق یہ نوٹ اب موجود نہیں، لیکن انٹرویوز کے ذریعے اس کی موجودگی کی تصدیق کی گئی ہے۔

یہ بھی پڑھیں:امریکی صدر ڈونلڈ ٹرمپ کا قریبی ساتھی چارلی کرک یونیورسٹی ایونٹ میں قتل

تحقیقات کے دوران، ایک ٹیکسٹ میسج بھی سامنے آیا جس میں رابنسن نے حملے کے منصوبے کا ذکر کیا تھا۔ واشنگٹن پوسٹ نے الگ سے رپورٹ کیا کہ رابنسن نے چیٹنگ پلیٹ فارم ڈسکارڈ پر بھی اعتراف کیا، جہاں اس نے گرفتاری سے قبل لکھا کہ ’کل یو وی یو پر میں تھا، مجھے اس سب پر افسوس ہے۔‘

ایف بی آئی کے مطابق، فارنزک ماہرین نے جائے واردات سے ملنے والی اشیا پر رابنسن کا ڈی این اے دریافت کیا، جن میں وہ تولیہ شامل ہے جس میں ممکنہ قاتل ہتھیار بندوق لپٹی ہوئی تھی اور ایک پیچ کس جو اس چھت پر پایا گیا جہاں سے گولی چلائی گئی۔

حکام کا کہنا ہے کہ اتنے شواہد کے باوجود، رابنسن تاحال تفتیش میں تعاون نہیں کر رہا۔ یوٹاہ کے گورنر اسپنسر کاکس نے بتایا کہ اب اس کے اہل خانہ اور دوستوں سے سوالات کیے جا رہے ہیں تاکہ اس کی اصل نیت کا پتا لگایا جا سکے۔ خاندان والوں نے پولیس کو بتایا ہے کہ رابنسن جو کہ ایک قدامت پسند مورمن گھرانے میں پلا بڑھا، حالیہ برسوں میں اپنے خاندان کی نظریاتی سوچ سے ہٹ گیا تھا اور چارلی کرک سے شدید نفرت کا اظہار کرتا تھا۔

ریاستی ووٹر ریکارڈز کے مطابق، رابنسن کسی سیاسی جماعت سے وابستہ نہیں تھا اور اس نے 2024 کے صدارتی انتخابات میں ووٹ بھی نہیں ڈالا۔

عدالتی کارروائی شروع

رابنسن پر باضابطہ فردِ جرم منگل کے روز عائد کی جائے گی اور وہ جیل سے ویڈیو لنک کے ذریعے عدالت میں پیش ہو گا۔

یہ قتل امریکہ میں بڑھتی ہوئی سیاسی پرتشدد کارروائیوں کے پس منظر میں پیش آیا ہے، جس کی مذمت دونوں سیاسی جماعتوں کی طرف سے کی گئی ہے، اگرچہ اس واقعے کی سیاسی تشریح پر اختلافات برقرار ہیں۔

ریپبلکن رہنماؤں، بشمول سابق صدر ڈونلڈ ٹرمپ، نے تجویز دیا کہ بائیں بازو کے گروہوں کی جانب سے پیدا کردہ سیاسی ماحول اس حملے کا بالواسطہ سبب ہو سکتا ہے، حالانکہ اس کے کوئی ٹھوس شواہد موجود نہیں۔ نائب صدر جے ڈی وینس نے کرک کے پوڈکاسٹ پر گفتگو کرتے ہوئے کہا کہ ’بائیں بازو کی انتہا پسندی کی تباہ کن تحریک‘ نے ایسے حالات پیدا کیے جو اس واقعے کا باعث بنے۔

ڈیموکریٹ رہنماؤں نے اس نظریے کو مسترد کرتے ہوئے کہا کہ سیاسی تشدد ایک قومی مسئلہ ہے، اور انہوں نے اس بات کی نشاندہی کی کہ ماضی میں بائیں بازو کی شخصیات بھی نشانہ بن چکی ہیں۔ ان کا کہنا تھا کہ کرک کی موت کو سیاسی فائدے کے لیے استعمال کرنا خطرناک رجحان ہو گا۔

چارلی کرک کی یاد میں

چارلی کرک، ٹرننگ پوائنٹ یو ایس اے کے بانی، نے قدامت پسند نوجوان ووٹروں کو متحرک کرنے میں اہم کردار ادا کیا، خاص طور پر ڈونلڈ ٹرمپ کی 2024 کی مہم کے دوران، ان کے حامی انہیں ایک پرجوش اور نڈر آواز کے طور پر یاد کرتے ہیں۔

تاہم ناقدین، خاص طور پر شہری حقوق کی تنظیمیں، کرک کو ایک متنازع شخصیت سمجھتے تھے، جو الیکشن فراڈ سے متعلق جھوٹے دعوے پھیلاتے اور اقلیتوں کے خلاف اشتعال انگیز زبان استعمال کرتے تھے۔

واشنگٹن میں، ایوان نمائندگان کے اسپیکر مائیک جانسن نے امریکی کیپیٹل کی اسٹیوچری ہال میں ایک شمع بردار تقریب کی قیادت کی، جس میں ارکانِ کانگریس اور سینکڑوں حامیوں نے شرکت کی۔

تحقیقات جاری

حکام اس بات کی چھان بین کر رہے ہیں کہ کیا رابنسن کسی آن لائن شدت پسندی کا شکار ہوا۔ اگرچہ اس کے کسی واضح سیاسی تعلق کی تصدیق نہیں ہوئی، لیکن اس کے سوشل میڈیا اور چیٹ ریکارڈز کا تجزیہ جاری ہے تاکہ اس کے نظریاتی رجحانات کو سمجھا جا سکے۔