ایشیا کپ میں پاکستان اور یو اے ای کے درمیان میچ سے قبل میچ ریدریاینڈی پائی کرافٹ سے متعلق تنازعہ حل ہو گیا ہے۔
میڈیا رپورٹس کے مطابق پاکستان نے میچ ریفری اینڈی پائی کرافٹ کو تبدیل کرنے کا مطالبہ منوانے کے بعد بدھ کو یو اے ای کے خلاف میچ کھیلنے کا فیصلہ کیا ہے۔ نئے میچ ریفری رچی رچرڈسن ہوں گے جو میچ کے دوران فرائض انجام دیں گے۔
تاہم، ترجمان پی سی بی کا کہنا ہے کہ پی سی بی نے ایشیاکپ پرکوئی حتمی فیصلہ نہیں کیا، مشاورت جاری ہے، کل تک فیصلہ کر لیا جائے گا، فیصلہ پاکستان کےمفادکو مدنظر رکھ کر کیا جائے گا۔
اس سے قبل انٹرنیشنل کرکٹ کونسل (آئی سی سی) نے پاکستان کرکٹ بورڈ (پی سی بی) کی درخواست کو مسترد کرتے ہوئے اینڈی پائی کرافٹ کو ایشیا کپ سے ہٹانے سے انکار کر دیا تھا۔
اس فیصلے کے بعد چئیرمین پی سی بی محسن نقوی نے حکومت سے مشاورت کے بعد ایونٹ سے دستبرداری کے حوالے سے غور کرنے کا عندیہ دیا تھا۔
بھارتی ویب سائٹ انڈیا ٹوڈے کی رپورٹ میں کہا گیا تھا کہ آئی سی سی نے خط کے جواب میں پی سی بی کو پائی کرافٹ کو ایشیا کپ سے ہٹانے کا مطالبہ رد کردیا اور اس حوالے سے آئی سی سی نے پی سی بی کو باقاعدہ طور پر آگاہ بھی کردیا ہے۔
خیال رہے کہ یہ تنازع اس وقت شروع ہوا جب پاک بھارت میچ کے دوران اینڈی پائی کرافٹ نے ٹاس کے موقع پر پاکستانی کپتان سلمان آغا کو ہدایت دی تھی کہ ہینڈ شیک نہیں کیا جائے گا۔ اینڈی پائی کرافٹ نےاس سے قبل پاکستان میڈیا منیجر سے کہا کہ یہ سب ریکارڈ نہیں ہونا چاہیے۔
بعد ازاں میچ کے اختتام پر پاکستانی میڈیا منیجر نوید اکرم چیمہ نے ٹورنامنٹ ڈائریکٹر سے تحفظات کا اظہار کیا تھا، جس پر بتایا گیا کہ یہ ہدایات بھارتی بورڈ اور حکومت کی طرف سے آئی تھیں۔
بعد ازاں، پاکستانی کپتان سلمان علی آغا نے بھی بھارتی رویے کے خلاف اختتامی تقریب میں احتجاجاً شرکت نہیں کی۔ علاوہ ازیں، بھارتی کپتان سوریا کمار یادیو کھیل میں سیاست کو لے آئے، پاکستان کے خلاف جیت کو پہلگام واقعے کے نام کر دیا تھا۔
پوسٹ میچ پریذنٹیشن میں سوریا کمار یادیو نے کرکٹ قوانین کی دھجیاں بکھیرتے ہوئےکہا کہ ’آج کی جیت کو پہلگام واقعے کے نام کرتا ہوں، پاکستان کے خلاف جیت بھارتی آرمی کے لیے ہماری طرف سے تحفہ ہے‘۔
واضح رہے کہ اتوار کو کھیلے گئے ایشیا کپ کے اس اہم میچ میں پاکستان کو بھارت کے ہاتھوں شکست کا سامنا کرنا پڑا تھا۔
By 
