بارشوں کا نیا سلسلہ کب تک جاری رہے گا؟ محکمہ موسمیات کی اہم پیشگوئی

محکمہ موسمیات نے ملک کے بیشتر اضلاع میں بارش کی پیشگوئی کی ہے۔

محکمہ موسمیات کے مطابق آج خیبرپختونخوا، اسلام آباد، خطہ پوٹھوہار، شمال مشرقی پنجاب، کشمیر اور گلگت بلتستان میں گرج چمک اور آندھی کے ساتھ بارش متوقع ہے۔ بالائی خیبرپختونخوا، پوٹھوہار، کشمیر اور پہاڑی علاقوں میں کہیں کہیں تیز بارش اور ژالہ باری بھی ہو سکتی ہے۔

اسلام آباد اور اس کے گردونواح میں بھی گرج چمک کے ساتھ بارش کا امکان ہے جبکہ چند مقامات پر ژالہ باری کی پیشگوئی کی گئی ہے۔ اسی طرح راولپنڈی، مری، گلیات، جہلم، اٹک اور چکوال میں بھی بارش متوقع ہے۔

شمالی پنجاب کے شہروں لاہور، سیالکوٹ، خوشاب، سرگودھا، نارووال، حافظ آباد، فیصل آباد، منڈی بہاؤالدین، گجرات، قصور اور گوجرانوالہ میں بھی گرج چمک کے ساتھ بارش کا امکان ہے۔

بلوچستان کے جنوبی علاقوں میں آسمان جزوی ابر آلود رہنے کا امکان ہے جبکہ سندھ کے ساحلی مقامات پر بھی کہیں کہیں بارش ہو سکتی ہے۔ خیبرپختونخوا کے اضلاع دیر، چترال، سوات، کوہستان، شانگلہ اور بٹگرام سمیت مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، چارسدہ، نوشہرہ، مردان، صوابی، خیبر، اورکزئی، کرم، پشاور، کوہاٹ، ہنگو، کرک اور وزیرستان میں بھی گرج چمک کے ساتھ بارش متوقع ہے۔

یہ بھی پڑھیں: گڈو اور سکھر بیراج پر اونچے درجے کا سیلاب: 80 سے زائد دیہات پانی کی لپیٹ میں آ گئے

آزاد کشمیر اور گلگت بلتستان میں بھی تیز ہواؤں اور گرج چمک کے ساتھ بارش کی پیشگوئی کی گئی ہے۔

گزشتہ 24 گھنٹوں کے دوران ملک کے بیشتر حصوں میں موسم گرم اور خشک رہا، تاہم بالائی خیبرپختونخوا کے کچھ علاقوں میں بارش ہوئی اور کراچی میں ہلکی بوندا باندی ریکارڈ کی گئی۔