ملک کے مختلف حصوں میں آندھی اور گرج چمک کیساتھ بارش کا امکان

محکمہ موسمیات نے ملک کے مختلف علاقوں میں آندھی اور گرج چمک کے ساتھ بارش کی پیشگوئی کی ہے، جبکہ دیگر علاقوں میں موسم گرم اور خشک رہنے کا امکان ظاہر کیا گیا ہے۔

بالائی خیبرپختونخوا، اسلام آباد، راولپنڈی، خطۂ پوٹھوہار، کشمیر اور گلگت بلتستان میں آندھی اور گرج چمک کے ساتھ بارش کا امکان ہے۔

پنجاب کے اہم شہروں جیسے لاہور، گوجرانوالہ، سیالکوٹ، نارووال، گجرات، جہلم، اٹک، چکوال اور مری میں بھی بارش متوقع ہے۔

خیبرپختونخوا کے اضلاع سوات، دیر، مانسہرہ، ایبٹ آباد، شانگلہ، کوہستان، باجوڑ، مہمند، اورکزئی اور خیبر میں گرج چمک کے ساتھ بارش کا امکان ظاہر کیا گیا ہے۔

یہ خبربھی پڑھیں :دریائے چناب میں سیلاب سے بندبوسن کے حالات سنگین، کئی بستیاں ڈوب گئیں

بلوچستان کے جنوبی علاقوں میں مطلع جزوی طور پر ابر آلود رہنے کی توقع ہے جبکہ سندھ کے ساحلی علاقوں میں چند مقامات پر ہلکی بارش ہو سکتی ہے۔

آزاد کشمیر اور گلگت بلتستان میں بھی تیز ہواؤں اور گرج چمک کے ساتھ بارش کی پیشگوئی کی گئی ہے۔

یہ بھی پڑھیں : پرائیویٹ حج سکیم کے تحت درخواستوں کی وصولی آج سے شروع

گزشتہ چوبیس گھنٹوں کے دوران اسلام آباد، بالائی پنجاب، خیبرپختونخوا اور کشمیر کے چند علاقوں میں بارش ہوئی، جبکہ ملک کے باقی حصوں میں موسم گرم اور خشک رہا۔