امریکی گرین کارڈ حاصل کرنے کے خواہشمند افراد کے لیے اہم خبر

امریکی محکمہ خارجہ نے ڈائیورسٹی ویزا لاٹری (گرین کارڈ لاٹری) کی رجسٹریشن کے لیے پہلی بار ایک ڈالر فیس متعارف کرائی ہے۔ یہ فیس 16 اکتوبر سے لاگو ہوگی اور رجسٹریشن کے وقت امریکی حکومت کی سرکاری ویب سائٹ پر الیکٹرانک اندراج کے دوران ادا کرنا ہوگی۔ یہ فیس ناقابل واپسی ہوگی اور صرف مجاز پورٹل کے ذریعے وصول کی جائے گی۔

محکمہ خارجہ کے مطابق، یہ فیس 330 ڈالر کی اس فیس سے علیحدہ ہوگی جو صرف منتخب امیدواروں سے وصول کی جاتی ہے۔

ڈائیورسٹی ویزا لاٹری پروگرام کے تحت ہر سال 55 ہزار تک ویزے ان ممالک کے افراد کو دیے جاتے ہیں جن کی امریکا میں امیگریشن کی شرح کم ہے۔ رپورٹس کے مطابق اس پروگرام کے لیے دنیا بھر سے سالانہ تقریباً 25 ملین رجسٹریشنز ہوتی ہیں۔ ایک ڈالر فیس سے حکومت کو سالانہ تقریباً 25 ملین ڈالر آمدنی متوقع ہے، جو سسٹم اپ گریڈنگ، ڈیٹا اکٹھا کرنے اور سیکیورٹی کے اقدامات پر خرچ کی جائے گی۔

محکمہ خارجہ کا کہنا ہے کہ یہ اقدام جعلسازی میں کمی لانے اور غیر متعلقہ تھرڈ پارٹی افراد کی دھوکہ دہی کو روکنے میں مددگار ہوگا۔ ساتھ ہی، فیس کے نفاذ سے طلب میں معمولی کمی آسکتی ہے، خاص طور پر ایسے ممالک میں جہاں مالی وسائل محدود ہیں۔

یہ بھی پڑھیں: امریکہ کا ایران پر نئی پابندیوں کا اعلان، متعدد ایرانی کمپنیز بلیک لسٹ

 ڈائیورسٹی ویزا لاٹری (گرین کارڈ لاٹری) کے لیے اہم ہدایات:

* 2027 یا آئندہ ڈی وی لاٹری میں رجسٹریشن کے لیے امریکی حکومت کے سرکاری ادائیگی پورٹل سے فیس کی ادائیگی کے طریقہ کار سے متعلق مکمل معلومات حاصل کریں۔
* رجسٹریشن کے لیے ہمیشہ امریکی حکومت کی سرکاری ویب سائٹ استعمال کریں اور تھرڈ پارٹی ویب سائٹس سے گریز کریں۔
* رجسٹریشن سے پہلے یہ یقینی بنائیں کہ تمام مطلوبہ دستاویزات اور ڈیجیٹل تصاویر موجود ہوں تاکہ کسی قسم کی تاخیر نہ ہو۔