دودھ اور دہی کی قیمتوں سے متعلق اہم خبر

لاہور میں دودھ اور دہی کی قیمتوں میں ایک بار پھر اضافہ کر دیا گیا ہے۔ نئے نرخوں کے مطابق دودھ کی فی لیٹر قیمت 20 روپے بڑھ کر 220 روپے ہو گئی ہے جبکہ دہی کی فی کلو قیمت بھی 20 روپے اضافے کے ساتھ 260 روپے مقرر کر دی گئی ہے۔ اس سے قبل دودھ 200 روپے فی لیٹر اور دہی 240 روپے فی کلو فروخت کیا جا رہا تھا۔

قیمتوں میں اس حالیہ اضافے کے بعد متوسط طبقے کے لیے روزمرہ کی یہ بنیادی اشیاء خریدنا مزید مشکل ہو گیا ہے۔

چیئرمین ملک ایسوسی ایشن نے وضاحت کی کہ حالیہ بارشوں اور سیلاب کی وجہ سے جانوروں کے چارے کی قیمتوں میں نمایاں اضافہ ہوا ہے، جس کا براہِ راست اثر دودھ کی پیداواری لاگت پر پڑا۔ ان کا کہنا تھا کہ چونکہ فارمرز کو جانوروں کی خوراک کے لیے زیادہ قیمت دینا پڑ رہی ہے، اس لیے دودھ کی قیمتوں میں اضافہ ناگزیر ہو گیا تھا۔

یہ بھی پڑھیں: گھی اور کوکنگ آئل کی قیمتوں کے حوالے سے اہم خبر

دوسری جانب شہریوں نے قیمتوں میں اضافے کو مسترد کرتے ہوئے حکومت سے مطالبہ کیا ہے کہ وہ دودھ اور دہی جیسی روزمرہ استعمال کی اشیاء کی قیمتوں کو کنٹرول کرنے کے لیے مؤثر اقدامات کرے۔ شہریوں کا کہنا ہے کہ مہنگائی نے پہلے ہی زندگی مشکل بنا دی ہے اور اب ان بنیادی ضروریات کی قیمتوں میں اضافہ ان کی مشکلات میں مزید اضافہ کر رہا ہے۔

عوامی حلقوں نے حکومت سے مطالبہ کیا ہے کہ ذخیرہ اندوزی اور منافع خوری کے خلاف کریک ڈاؤن کیا جائے اور ایسے اقدامات کیے جائیں جن سے کسانوں اور صارفین دونوں کو ریلیف فراہم ہو۔