نئے گیس کنکشنز کی فیس کتنی ہے؟ تفصیلات سامنے آگئی

سوئی ناردرن گیس پائپ لائنز لمیٹڈ (ایس این جی پی ایل) نے نئے گھریلو گیس کنکشن کے لیے درخواستیں وصول کرنے کا آغاز کردیا ہے۔

آفیشل ویب سائٹ پر جاری اعلامیے کے مطابق ترجیح ان درخواست دہندگان کو دی جائے گی جنہوں نے پابندی کے نفاذ سے قبل ہی فوری فیس یا ڈیمانڈ نوٹس جمع کرادیا تھا۔

درخواست دہندگان آر ایل این جی معاہدے پر دستخط کرنے اور سیکیورٹی کے فرق کی ادائیگی کے ذریعے کنکشن حاصل کرسکتے ہیں۔ کمپنی کے مطابق وہ درخواست دہندگان جنہوں نے پہلے ہی سسٹم گیس کنکشن کے لیے درخواستیں دی تھیں، انہیں عام یا فاسٹ ٹریک میرٹ پر نئی آر ایل این جی پر مبنی درخواست جمع کرانے کا اختیار حاصل ہوگا۔

فاسٹ ٹریک درخواست کی فوری فیس 25 ہزار روپے مقرر کی گئی ہے۔ نئے آر ایل این جی پر مبنی کنکشن کے چارجز میں قابل واپسی سیکیورٹی 20 ہزار روپے شامل ہے، جبکہ سروس لائن کی لاگت 10 مرلہ تک کے گھر کے لیے 1500 روپے اور 10 مرلہ سے زائد کے گھر کے لیے 3000 روپے مقرر کی گئی ہے۔

یہ بھی پڑھیں: گیس کی خریداری اور فروخت کے شعبے میں سوئی گیس کمپنیوں کی اجارداری کا خاتمہ

کمپنی نے واضح کیا ہے کہ درخواست جمع کروانے کے لیے کوئی فیس مقرر نہیں ہے۔ تاہم درآمدی آر ایل این جی کنکشن کا ٹیرف روایتی گھریلو گیس کے نرخوں کے مقابلے میں 70 فیصد زیادہ ہوگا۔