وزیراعظم شہباز شریف سے بل گیٹس کی ملاقات، صحت اور ڈیجیٹل تبدیلی میں تعاون پر اتفاق

نیویارک میں اقوام متحدہ کی جنرل اسمبلی کے 80ویں اجلاس کے موقع پر وزیراعظم محمد شہباز شریف سے گیٹس فاؤنڈیشن کے چیئرمین بل گیٹس نے ملاقات کی، جس میں صحت اور ڈیجیٹل تبدیلی کے لیے مل کر کام کرنے پر اتفاق کیا گیا۔

وزیراعظم نے 2025 کے حالیہ سیلاب کے دوران گیٹس فاؤنڈیشن کی فراخدلانہ امداد پر شکریہ ادا کیا اور 2022 کے سیلاب میں فراہم کی گئی اہم معاونت کو بھی سراہا۔ انہوں نے پاکستان میں پولیو کے خاتمے، حفاظتی ٹیکہ جات، غذائیت میں بہتری اور مالی شمولیت کے لیے گیٹس فاؤنڈیشن کی قیمتی شراکت داری کی تعریف کی۔

وزیراعظم کا کہنا تھا کہ پولیو کا خاتمہ حکومت کی اولین ترجیح ہے اور اس مقصد کے حصول کے لیے گیٹس فاؤنڈیشن کے ساتھ شراکت داری انتہائی اہم ہے۔ انہوں نے معیشت کی بحالی، کیش لیس ڈیجیٹل نظام اور معاشی اصلاحات کے حوالے سے حکومتی اقدامات پر روشنی ڈالی اور ان شعبوں میں گیٹس فاؤنڈیشن کے تعاون کو خصوصی طور پر سراہا۔

یہ بھی پڑھیں: ڈپلومیٹک پاسپورٹ کیس : سابق وزیراعظم آزاد کشمیر تنویر الیاس پر فرد جرم عائد

دونوں رہنماؤں نے صحت، غذائیت، ڈیجیٹل تبدیلی اور ملک کی مجموعی سماجی و اقتصادی ترقی کے لیے تعاون کو مزید فروغ دینے کے عزم کا اعادہ کیا۔