امریکی صدر ڈونلڈ ٹرمپ نے دوٹوک الفاظ میں واضح کردیا ہے کہ وہ اسرائیل کو مغربی کنارے کے انضمام کی اجازت نہیں دیں گے۔
امریکی صدر نے اوول آفس میں صحافیوں سے گفتگو کے دوران کہا کہ اب بہت ہو چکا ہے، میں اسرائیل کو مغربی کنارے کو ضم کرنے کی اجازت نہیں دوں گا، یہ سلسلہ اب رکنا چاہیے۔
ٹرمپ نے بتایا کہ اس معاملے پر اسرائیلی وزیراعظم نیتن یاہو سے بھی بات ہوئی ہے۔
امریکی میڈیا رپورٹ کے مطابق صدر ٹرمپ نے اقوام متحدہ کی جنرل اسمبلی کے موقع پر عرب رہنماؤں کو بھی یقین دہانی کرائی کہ وہ اسرائیل میں مغربی کنارے کے انضمام کے منصوبے کی مخالفت کرتے ہیں۔
حال ہی میں اسرائیلی حکام کی جانب سے کہا گیا تھا ان کی حکومت مغربی کنارے کے کچھ حصوں پر کنٹرول حاصل کرنے کے لیے اقدامات کر سکتی ہے۔
تاہم ٹرمپ نے واضح الفاظ میں کہا کہ اس معاملے پر اسرائیلی وزیراعظم نیتن یاہو سے بھی بات ہو چکی ہے اور وہ کسی صورت انضمام کی اجازت نہیں دیں گے۔
گزشتہ روز امریکی خصوصی ایلچی برائے مشرق وسطیٰ اسٹیو وٹکوف نے بھی کہا تھا کہ صدر ٹرمپ کی مسلم رہنماؤں سے ملاقات مثبت رہی اور توقع ہے کہ غزہ میں جاری جنگ کے خاتمے کی کوششوں میں جلد پیش رفت ہو سکتی ہے۔
عرب ممالک کا انتباہ
قبل ازیں مسلم اورعرب ممالک نے امریکی صدر کو خبردار کرتے ہوئے کہا ہے کہ مغربی کنارے کا اسرائیل سے الحاق خطرناک ہوگا۔
سعودی وزیر خارجہ شہزادہ فیصل بن فرحان نے صحافیوں سے بات چیت کرتے ہوئے کہا کہ ڈونلڈ ٹرمپ کو اسرائیلی اقدامات سے مکمل آگاہ کردیا ہے،غزہ میں امن مغربی کنارے سے جڑا ہے۔
شہزادہ فیصل بن فرحان نے کہا کہ غزہ جنگ بندی کا ممکنہ معاہدہ مغربی کنارے کے الحاق سے خطرے میں پڑ جائے گا، اسرائیل غزہ میں فلسطینیوں کی نسل کشی کر رہا ہے۔
By 
