موٹرسائیکل استعمال کرنے والوں کے لئے اہم خبر

اسلام آباد ٹریفک پولیس نے شہریوں کو ہدایت کی ہے کہ وہ یکم اکتوبر تک ہیلمٹ خرید کر استعمال شروع کریں اور ایکسائز آفس کی جانب سے جاری کردہ اصل نمبر پلیٹس اپنی موٹرسائیکل پر لازمی لگائیں۔

ترجمان اسلام آباد پولیس کے مطابق چیف ٹریفک آفیسر (سی ٹی او) حمزہ ہمایوں نے واضح کیا ہے کہ یکم اکتوبر کے بعد ہیلمٹ نہ پہننے، بغیر اصل نمبر پلیٹ کے سفر کرنے، ون ویلنگ، لین وائلیشن اور بغیر سائلنسر موٹرسائیکل چلانے والوں کے خلاف بھرپور کریک ڈاؤن کیا جائے گا۔

سی ٹی او نے مزید کہا کہ تمام موٹرسائیکل سوار سات اکتوبر تک اپنے ڈرائیونگ لائسنس یا لرنر پرمٹ بھی بنوا لیں، بصورت دیگر ان کے خلاف سخت کارروائی ہوگی۔

ان کا کہنا تھا کہ شہری اپنی اور دوسروں کی جان کو خطرے میں نہ ڈالیں کیونکہ رواں سال سب سے زیادہ اموات موٹرسائیکل سواروں کی اپنی غلطیوں کے باعث ہوئیں۔

یہ بھی پڑھیں: پرانی موٹر سائیکل کے بدلے نئی حاصل کریں، یاماہا کمپنی نے بڑی آفرلگا دی

اسلام آباد پولیس کے مطابق ون وے کی خلاف ورزیوں پر پہلے ہی سخت اقدامات کیے جا رہے ہیں اور اب دیگر خلاف ورزیوں پر بھی کوئی رعایت نہیں دی جائے گی۔ پولیس نے شہریوں پر زور دیا ہے کہ وہ ٹریفک قوانین پر عمل کریں تاکہ حادثات اور قیمتی جانوں کے ضیاع سے بچا جا سکے۔