پنجاب اسمبلی میں پی ٹی آئی نے اپوزیشن لیڈر اور ڈپٹی اپوزیشن لیڈر کا تقرر کر دیا

پاکستان تحریک انصاف نے پنجاب اسمبلی میں اپوزیشن لیڈر کا اعلان کر دیا۔

پی ٹی آئی کی جانب سے جاری اعلامیے کے مطابق، بانی چیئرمین عمران خان کی ہدایت پر معین قریشی کو اپوزیشن لیڈر پنجاب اسمبلی مقرر کیا گیا ہے۔ اس کے علاوہ حافظ فرحت عباس کو ڈپٹی اپوزیشن لیڈر پنجاب اسمبلی تعینات کیا گیا ہے۔

پی ٹی آئی کے مرکزی رہنما فردوس شمیم نقوی نے پنجاب اسمبلی میں اپوزیشن لیڈر اور ڈپٹی اپوزیشن لیڈر کی تقرری کا نوٹیفکیشن جاری کر دیا۔ نوٹیفکیشن میں کہا گیا ہے کہ بانی چیئرمین کی ہدایت پر معین قریشی کو اپوزیشن لیڈر نامزد کیا گیا ہے اور دونوں کی تقرریاں تاحکم ثانی برقرار رہیں گی۔

یاد رہے کہ 22 جولائی کو انسداد دہشت گردی عدالت سرگودھا نے 9 مئی کے میانوالی احتجاجی مقدمے میں اپوزیشن لیڈر پنجاب اسمبلی ملک احمد بچھر سمیت 32 ملزمان کو 10، 10 سال قید کی سزا سنائی تھی۔ عدالت کی جانب سے سزا کے بعد الیکشن کمیشن آف پاکستان نے ملک احمد بچھر کی نااہلی کا نوٹیفکیشن جاری کیا تھا، جس کے بعد پنجاب اسمبلی میں اپوزیشن لیڈر کا منصب خالی تھا۔

یہ بھی پڑھیں: تحریک انصاف نے معین قریشی کو پنجاب اسمبلی میں اپوزیشن لیڈر نامزد کردیا