آئی سی سی ویمن ورلڈ کپ 2025 کے مقابلوں کے دوران آج روایتی حریف پاکستان اور بھارت کی خواتین کرکٹ ٹیمیں کولمبو کے پریما داسا اسٹیڈیم میں ایک دوسرے کے مدمقابل ہوں گی۔
میچ کی تیاری کے سلسلے میں پاکستان ویمن کرکٹ ٹیم کی ہفتے کو شیڈول کی گئی ٹریننگ بارش کی وجہ سے منسوخ ہو گئی، تاہم کھلاڑیوں نے ان ڈور سیشنز میں بھرپور مشقیں کیں۔ ٹیم نے ان ڈور نیٹس پر بیٹنگ اور بولنگ کی پریکٹس کے علاوہ ہیڈ کوچ محمد وسیم اور دیگر کوچز کی نگرانی میں فزیکل ٹریننگ بھی کی۔
آج کے میچ پر بارش کا بھی اثر پڑنے کا امکان ہے کیونکہ میچ کے آغاز سے قبل وقفے وقفے سے بارش کی پیش گوئی کی گئی ہے۔
ایک روزہ کرکٹ کے ریکارڈ پر نظر ڈالیں تو پاکستان اور بھارت کی خواتین ٹیموں کے درمیان اب تک 11 میچ کھیلے جا چکے ہیں، جن میں بھارت نے تمام میں کامیابی حاصل کی ہے۔ دونوں ٹیموں کے درمیان آخری ایک روزہ مقابلہ 6 مارچ 2022 کو نیوزی لینڈ میں ورلڈ کپ کے دوران ہوا تھا، جس میں بھارت نے پاکستان کو 107 رنز سے شکست دی تھی۔
واضح رہے کہ آئی سی سی ویمن ورلڈ کپ 2025 کے پہلے میچ میں پاکستان کو بنگلہ دیش کے خلاف شکست کا سامنا کرنا پڑا تھا، جبکہ بھارت نے اپنے پہلے میچ میں سری لنکا کو شکست دی تھی۔
آج کا میچ شائقین کرکٹ کے لیے خاص اہمیت رکھتا ہے کیونکہ دونوں ٹیموں کے درمیان ہمیشہ سے سخت اور دلچسپ مقابلے دیکھنے کو ملتے ہیں۔
By 
