عالمی مالیاتی منظرنامے میں اہم سنگ میل عبور، پاکستان دوسری اُبھرتی معیشت قرار

بین الاقوامی جریدے بلومبرگ کی حالیہ رپورٹ کے مطابق، پاکستان کو عالمی مالیاتی منظرنامے میں دوسری بڑی ابھرتی ہوئی معیشت قرار دیا گیا ہے، جو عالمی اعتماد کی بحالی کا ثبوت ہے۔

جریدے کے مطابق پاکستان نے عالمی مالیاتی منظرنامے میں نئی تاریخ رقم کر دی ہے، پاکستان ڈیفالٹ رسک میں کمی کے لحاظ سے دنیا میں دوسرے نمبر پر آگیا ہے۔

بلومبرگ کے مطابق جون 2024 سے ستمبر 2025 تک پاکستان نے وہ معاشی کارکردگی دکھائی جو دنیا کی بڑی ابھرتی معیشتیں حاصل نہ کر سکیں، کریڈٹ ڈیبٹ سویپ کے مطابق دیوالیہ ہونے کے خطرات میں 2,200 بیسس پوائنٹس کی غیر معمولی کمی واقع ہوئی۔

اپنی رپورٹ میں بلومبرگ نے پاکستان کو واحد ابھرتی ہوئی معیشت قرار دیا جس نے چار سہ ماہیوں میں اپنی مالی ساکھ میں بہتری دکھائی، عالمی درجہ بندی میں پاکستان ترکی کے بعد دوسرا سب سے بہتر ہونے والا ملک بن گیا ہے۔

 یہ خبر بھی پڑھیں :پاکستان امریکی صدر کا پسندیدہ ملک ، بھارت کو دباؤ کا سامنا ، بلومبرگ کا دعویٰ

جریدے کے مطابق یہ پیش رفت عالمی سرمایہ کاروں کے بڑھتے ہوئے اعتماد کی عکاس ہے، مالیاتی نظم و ضبط، سٹرکچرل ریفارمز، قرضوں کی بروقت ادائیگی، اور آئی ایم ایف پروگرام پر مکمل عملدرآمد نے پاکستانی معیشت کو استحکام دیا ہے۔

رپورٹ میں بتایا گیا کہ حکومت کی موثر پالیسیوں نے نہ صرف مہنگائی پر قابو پایا بلکہ روپے کو مستحکم کرتے ہوئے بیرونی خسارے کو بھی محدود کیا، بین الاقوامی کریڈٹ ریٹنگ ایجنسیاں فچ ، ایس اینڈ پی اور موڈیز نے پاکستان کے حوالے سے مثبت آؤٹ لک کو برقرار رکھا ہے۔

یہ بھی بتایا گیا کہ عالمی سطح پر یہ تاثرمزید مضبوط ہوا ہے کہ پاکستان پالیسی کے تسلسل اور مالی شفافیت کے ذریعے اپنے اقتصادی اہداف کی جانب گامزن ہے ، ملک اب عالمی سرمایہ کاروں کے لیے ایک محفوظ، پُرکشش اور منافع بخش منزل بن چکا ہے۔