ملک میں سیمنٹ کی ریٹیل قیمتوں میں مجموعی طور پر استحکام دیکھا گیا ہے تاہم کچھ شہروں میں معمولی کمی اور بعض میں قیمتیں برقرار رہیں۔
ادارہ شماریات پاکستان کی جانب سے جاری اعداد و شمار کے مطابق 2 اکتوبر 2025 کو ختم ہونے والے ہفتے میں سیمنٹ کی فی بوری اوسط قیمت 1382 روپے ریکارڈ کی گئی۔
رپورٹ کے مطابق ملک کے شمالی علاقوں میں سیمنٹ کی اوسط قیمت 1381 روپے رہی، جو گزشتہ ہفتے کے مقابلے میں 0.10 فیصد کم ہے۔
دوسری جانب، جنوبی علاقوں میں سیمنٹ کی قیمت 1449 روپے فی بوری پر برقرار رہی، جس میں کسی قسم کی کمی یا اضافہ نہیں ہوا۔
اگر ہم شہروں کی بات کریں تو اسلام آباد میں سیمنٹ کی اوسط قیمت 1357 روپے، راولپنڈی میں 1361 روپے، گوجرانوالہ میں 1420 روپے، سیالکوٹ میں 1380 روپے، لاہور میں 1428 روپے، فیصل آباد میں 1380 روپے، سرگودھا میں 1370 روپے، ملتان میں 1416 روپے، بہاولپور میں 1450 روپے، پشاور میں 1350 روپے اور بنوں میں 1280 روپے فی بوری ریکارڈ کی گئی۔
اسی طرح کراچی میں سیمنٹ کی فی بوری قیمت 1367 روپے جبکہ حیدرآباد میں 1427 روپے رہی ، سکھر میں سیمنٹ کی قیمت 1500 روپے، لاڑکانہ میں 1407 روپے، کوئٹہ میں 1510 روپے اور خضدار میں 1483 روپے فی بوری ریکارڈ کی گئی۔
ماہرین کے مطابق سیمنٹ کی قیمتوں میں حالیہ استحکام کی وجہ طلب و رسد کا توازن اور مارکیٹ میں کسی بڑی تبدیلی کا نہ آنا ہے۔ تاہم مستقبل میں اقتصادی عوامل، ٹرانسپورٹیشن لاگت یا پالیسی میں تبدیلی کی صورت میں قیمتوں میں اتار چڑھاؤ کا امکان نظر آتا ہے۔
By 
