نہ لمبی قطاریں، نہ گھنٹوں انتظار، پاسپورٹ کا حصول اب ہوا آسان

نہ لمبی قطاریں، نہ گھنٹوں انتظار، پاسپورٹ کا حصول اب آسان ہوگیا ہے۔

وفاقی وزیر داخلہ محسن نقوی نے ایگزیکٹو پاسپورٹ آفس ڈیفنس کا اچانک دورہ کیا۔ اس موقع پر انہوں نے پاسپورٹ بنوانے کے لیے آئے شہریوں سے ملاقات کی اور پاسپورٹ کے عمل کے بارے میں دریافت کیا۔ وزیر داخلہ نے شہریوں سے پاسپورٹ کی بروقت ترسیل کے متعلق بھی استفسار کیا۔

شہریوں نے پاسپورٹ بنوانے کے انتظامات پر اطمینان کا اظہار کرتے ہوئے کہا کہ صرف پانچ منٹ میں باری آ جاتی ہے اور پاسپورٹ بنوانے کا پراسیس بھی فوری مکمل ہو جاتا ہے۔ شہریوں کا کہنا تھا کہ پہلے کئی کئی گھنٹے انتظار کرنا پڑتا تھا اور باری آنے پر سسٹم ڈاؤن ہو جاتا تھا، لیکن اب تمام عمل بہت بہتر ہے۔

شہریوں نے مزید کہا کہ پاسپورٹ آفس کا عملہ مکمل رہنمائی فراہم کرتا ہے اور پورا پراسیس قابل تعریف ہے۔ ساتھ ہی یہ بھی بتایا گیا کہ پاسپورٹ اب مقررہ مدت کے اندر ڈلیور بھی ہو رہا ہے۔

یہ بھی پڑھیں: برطانوی پاسپورٹ رکھنے والوں کے لیے بڑا اعلان

وزیر داخلہ محسن نقوی نے بہترین انتظامات اور شہریوں کے اظہارِ اطمینان پر آفس انچارج اور عملے کی کارکردگی کو سراہا۔ ان کا کہنا تھا: “پاسپورٹ آفس آ کر دلی خوشی ہوئی، بلاشبہ شہریوں کا اطمینان ہی ہماری کامیابی ہے۔”