پنجاب حکومت کی جانب سے متعارف کرائی گئی ای-ٹیکسی اسکیم 2025 کے لیے درخواستیں جمع کرانے کا مرحلہ مکمل ہو گیا ہے اور اب امیدوار ای-بیلٹنگ کی تاریخ کے اعلان کے منتظر ہیں۔
تفصیلات کے مطابق یہ منصوبہ صوبے میں صاف، سبز اور جدید ٹرانسپورٹ سسٹم کی جانب ایک اہم قدم ہے۔ حکومتی ترجمان نے بتایا کہ یہ اسکیم ماحولیاتی تحفظ، خواتین کے بااختیار بنانے اور روزگار کے مواقع بڑھانے کے حکومتی وژن کا حصہ ہے۔
اس منصوبے کے تحت اہل شہریوں کو بلا سود قرضے فراہم کیے جائیں گے تاکہ وہ الیکٹرک گاڑیاں خرید کر کمرشل مقاصد کے لیے استعمال کر سکیں۔ اس اسکیم کے ذریعے نہ صرف فضائی آلودگی کم کرنے کا ہدف رکھا گیا ہے بلکہ خواتین کے لیے خصوصی کوٹہ بھی مختص کیا گیا ہے۔
حکام کے مطابق اگر موصول ہونے والی درخواستوں کی تعداد دستیاب گاڑیوں سے زیادہ ہوئی تو شفافیت کو یقینی بنانے کے لیے ای-بیلٹنگ کرائی جائے گی۔ تاہم، سرکاری طور پر ای-بیلٹنگ کے انعقاد کا اعلان ابھی تک نہیں کیا گیا۔
حکومتی ذرائع کا کہنا ہے کہ اس حوالے سے تفصیلات جلد ہی سرکاری ذرائع ابلاغ کے ذریعے جاری کر دی جائیں گی۔
By 
