پاکستان کی کامیابیوں کا سفر جاری، اوساکا ایکسپو 2025 میں 2 بین الاقوامی ایوارڈز جیت لیے

پاکستان نے جاپان کے تاریخی شہر اوساکا میں منعقدہ عالمی نمائش ایکسپو 2025 میں دو بین الاقوامی اعزازات حاصل کر کے عالمی سطح پر اپنی تخلیقی صلاحیتوں اور ثقافتی شناخت کو بھرپور انداز میں منوایا ہے۔

میڈیا رپورٹ کے مطابق پاکستانی پویلین کو نمائش کی کیٹیگری میں ’کانسی کا تمغہ دیا گیا، جو دنیا بھر کے پویلینز کے مابین تخلیق، جدت اور پیشکش کے انداز پر مبنی سخت مقابلے کے بعد حاصل ہوا۔

یہ بھی پڑھیں:پاکستان کا قابلِ فخر کارنامہ، ایک اور عالمی اعزاز اپنے نام کرلیا

اس کے علاوہ پاکستان کو دوسرا بڑا اعزاز ’ایڈیٹرز چوائس ایوارڈ‘ کی صورت میں ملا، جو اُن ممالک کو دیا جاتا ہے جن کے پویلینز غیر معمولی تخلیقی صلاحیت، اختراعات اور وژن کے حامل ہوں۔ یہ ایوارڈز بین الاقوامی میڈیا، ماہرین اور ججز کے پینل کی جانب سے دیے جاتے ہیں، جو ایکسپو میں موجود تمام پویلینز کا بغور مشاہدہ کرتے ہیں۔

Alhamdulilah great effort done by team TDAP, Commerce, Mission and curator.

Pakistan pavilion not only showed depth in the concept of its pavilion, but riches and content. Huge number of people came and witnessed the display of historic theme presented.

“ Universe in a grain of… pic.twitter.com/c0YInYX3bi

— Jam Kamal Khan (@jam_kamal) October 12, 2025

کم جگہ، زیادہ پذیرائی

حیران کن طور پر پاکستانی پویلین کو صرف 53 مربع میٹر کی محدود جگہ فراہم کی گئی تھی، مگر اس محدود رقبے میں بھی پاکستان نے اپنی ثقافت، سیاحت، آرٹ، دستکاری اور ٹیکنالوجی کے امتزاج سے ایک ایسا پویلین تیار کیا جو لاکھوں لوگوں کی توجہ کا مرکز بن گیا۔ رپورٹ کے مطابق، 17 لاکھ سے زیادہ افراد نے پاکستانی پویلین کا دورہ کیا، جو ایک ریکارڈ سمجھا جا رہا ہے۔

ایکسپو کی عالمی اہمیت

ایکسپو 2025 اوساکا کا شمار دنیا کی سب سے بڑی عالمی نمائشوں میں ہوتا ہے، جہاں 100 سے زیادہ ممالک نے شرکت کی۔ ہر ملک نے اپنی ثقافت، اقتصادی وژن، اختراعات اور مستقبل کی ترقی کو نمایاں کرنے کے لیے خصوصی اسٹالز اور پویلینز ترتیب دیے۔ یہ ایونٹ کئی ماہ تک جاری رہا اور دنیا بھر سے لاکھوں افراد نے نمائش کا رخ کیا۔

مزید پڑھیں:اسد واحد کا شاندار کارنامہ، پاکستان کو ایک اورعالمی اعزاز دلا دیا

حکومتی اور سفارتی ردِ عمل

پاکستان کی وزارتِ اطلاعات و نشریات اور وزارتِ تجارت کی جانب سے اس کامیابی پر خوشی کا اظہار کیا گیا ہے۔ ذرائع کے مطابق، پاکستانی سفارت خانے اور ایکسپو میں شریک ٹیم نے نہایت محنت اور تخلیقی منصوبہ بندی کے تحت یہ پویلین تیار کیا۔ پاکستانی حکام نے کہا ہے کہ یہ کامیابی پاکستان کی سوفٹ امیج کو بہتر بنانے اور دنیا میں ملک کی مثبت پہچان اجاگر کرنے میں مددگار ثابت ہو گی۔

عالمی سطح پر پاکستان کا اُبھرتا چہرہ

بین الاقوامی تجزیہ کاروں کا کہنا ہے کہ پاکستان کی یہ شاندار کامیابی نہ صرف تخلیقی صلاحیتوں کی عکاسی ہے بلکہ یہ ظاہر کرتی ہے کہ پاکستان عالمی پلیٹ فارمز پر اپنے مثبت اور ترقی پسند چہرے کے ساتھ مؤثر انداز میں ابھر رہا ہے۔