پاکستان کو جنوبی افریقا پر 145 رنز کی برتری، تیسرے دن کا کھیل، دوسری اننگز میں 2 وکٹیں گنوا دیں، مقابلہ جاری

جنوبی افریقا کے خلاف لاہور ٹیسٹ کے تیسرے دن کھانے کے وقفے تک پاکستان نے دوسری اننگز میں 2 وکٹوں کے نقصان پر 36 رنز بنالیے ہیں جبکہ اسے مجموعی طور پر 145 رنز کی برتری حاصل ہوگئی ہے۔

یہ بھی پڑھیں:پاکستان، جنوبی افریقہ ٹیسٹ سیریز کا آغاز، شان مسعود کا  ٹاس جیت کر بیٹنگ کا فیصلہ

پاکستان کی جانب سے پہلی اننگز میں 93 رنز بنانے والے اوپننگ بیٹر اس بار جلد ہی پویلین لوٹ گئے۔ وہ اسپنر سیموون ہارمر کی گیند پر باہر نکل کر دفاع کرنا چاہتے تھے لیکن ناکام رہے اور بولڈ ہوگئے۔ دوسری جانب کپتان شان مسعود، جنہوں نے پہلی اننگز میں 76 رنز بنائے تھے، صرف 7 رنز کا اضافہ کر سکے۔ اس وقت وکٹ پر عبد اللہ شفیق 21 رنز اور بابراعظم 1 رن کے ساتھ موجود ہیں۔

قبل ازیں جنوبی افریقی ٹیم اپنی پہلی اننگز میں 269 رنز پر ڈھیر ہوگئی۔ اس طرح پاکستان کو پہلی اننگز میں 109 رنز کی برتری حاصل ہوئی۔

کھیل کے تیسرے دن جنوبی افریقا نے 216 رنز 6 کھلاڑی آؤٹ پر اننگز دوبارہ شروع کی۔ ٹونی ڈی ذورزی نے 81 اور سینورن متھوسوامی نے 6 رنز کے ساتھ بیٹنگ کا آغاز کیا۔ جلد ہی متھوسوامی 11 رنز بنا کر ساجد خان کا شکار بنے۔ اس کے بعد ٹونی ڈی ذورزی نے سنچری مکمل کی مگر 104 رنز پر نعمان علی کی گیند پر اونچا شاٹ کھیلنے کی کوشش میں شاہین آفریدی کو کیچ دے بیٹھے۔

گیسو ربادا بغیر کوئی رن بنائے ساجد خان کی گیند پر آؤٹ ہوئے۔ ساجد خان نے اننگز میں 3 وکٹیں حاصل کیں جبکہ نعمان علی نے شاندار بولنگ کرتے ہوئے 6 کھلاڑیوں کو پویلین کی راہ دکھائی۔ سلمان علی آغا نے بھی ایک وکٹ حاصل کی۔

مزید پڑھیں:جنوبی افریقہ کرکٹ ٹیم کا دورۂ پاکستان ، حکومت کا سیکیورٹی سے متعلق بڑا اعلان

یاد رہے کہ پاکستان نے اپنی پہلی اننگز میں 378 رنز بنائے تھے۔ امام الحق اور سلمان علی آغا نے 93، 93 رنز کی اننگز کھیلی، محمد رضوان نے 75 اور شان مسعود نے 76 رنز اسکور کیے۔

ٹیسٹ کے تیسرے دن تک پاکستان نے میچ پر اپنی گرفت مضبوط کر لی ہے اور دیکھنا ہوگا کہ بقیہ دنوں میں یہ برتری کس حد تک بڑھائی جا سکتی ہے۔