شمالی علاقہ جات میں سردی کی آمد، برفباری کے بعد سیاحوں کا رش

ملک کے شمالی علاقہ جات میں سردی نے باقاعدہ طور پر دستک دے دی ہے۔ برف سے ڈھکے پہاڑوں پر سورج کی کرنوں کی چمک اور ٹھنڈی ہواؤں کے جھونکوں نے سردیوں کی آمد کا اعلان کر دیا۔

حالیہ برفباری کے بعد وادی کاغان کی خوبصورتی میں مزید اضافہ ہو گیا ہے، جہاں قدرت کے حسین مناظر سے لطف اندوز ہونے کے لیے سیاح بڑی تعداد میں پہنچ رہے ہیں۔

وادی میں برف پر پڑتی سورج کی مدھم روشنی ایک دلکش اور جادوئی منظر تخلیق کرتی ہے جو دیکھنے والوں کو اپنے سحر میں مبتلا کر دیتی ہے۔ برفباری کے بعد علاقے کے ہوٹلوں، گیسٹ ہاؤسز اور ریسٹورنٹس میں سیاحوں کا رش بڑھ گیا ہے، جس سے مقامی معیشت میں بھی دوبارہ رونق لوٹ آئی ہے۔ مقامی تاجر اور ٹرانسپورٹرز کے مطابق سردیوں کے آغاز کے ساتھ کاروبار میں واضح بہتری آئی ہے اور برفباری کے باعث گرم کپڑوں، چائے، قہوے اور مقامی کھانوں کی مانگ میں بھی اضافہ ہوا ہے۔

یہ بھی پڑھیں: محکمہ موسمیات کی ملک بھر میں سردی اور بارشوں سے متعلق اہم پیشگوئی

ادھر بابوسر ٹاپ، ناران، شوگراں اور ہنزہ جیسے معروف سیاحتی مقامات پر بھی برفباری کے باعث درجہ حرارت میں نمایاں کمی دیکھی جا رہی ہے۔ محکمہ موسمیات نے پیشگوئی کی ہے کہ آئندہ دنوں میں مزید برفباری کا امکان ہے، جس سے سردی کی شدت میں اضافہ ہوگا۔

سیاحوں کو مشورہ دیا گیا ہے کہ وہ سفر سے قبل موسم کی تازہ صورتحال معلوم کریں اور ضروری احتیاطی تدابیر اختیار کریں۔ قدرتی حسن سے مالا مال شمالی علاقہ جات رفتہ رفتہ برفانی مناظر میں تبدیل ہو رہے ہیں، جو سردیوں کے آغاز کے ساتھ ہی ملک بھر کے سیاحوں کی توجہ کا مرکز بن گئے ہیں۔

یہ بھی پڑھیں: وزیراعلیٰ خیبر پختونخوا نے صنم جاوید کی گرفتاری کا نوٹس لے لیا،آئی جی سے رپورٹ طلب