راولپنڈی میں پاکستان اورجنوبی افریقہ کے ٹیسٹ میچ کے لیے ٹریفک پلان جاری

راولپنڈی ٹریفک پولیس نے 20 سے 24 اکتوبر تک راولپنڈی کرکٹ سٹیڈیم میں ہونے والےپاکستان-جنوبی افریقہ کے مابین دوسرے ٹیسٹ میچ کے لیے ایک مفصل ٹریفک مینجمنٹ پلان کا اعلان کیا۔

سٹی ٹریفک آفیسر (سی ٹی او) فرحان اسلم نے کہا کہ اسٹیڈیم کے ارد گرد 367 ٹریفک وارڈنز اور افسران تعینات کیے جائیں گے تاکہ پورے ایونٹ میں ٹریفک کی روانی اور عوام کی سہولت کو یقینی بنایا جا سکے۔

انہوں نے کہا کہ ٹریفک رش کو کم کرنے کے لیے ایک خصوصی ٹریفک ڈائیورژن پلان تیار کیا گیا ہے، جس میں گاڑی چلانے والوں کی مدد کے لیے کلیدی ڈائیورشن پوائنٹس پر اضافی اہلکار تعینات کیے گئے ہیں۔

اسلام آباد سے آنے والی ٹریفک کو فیض آباد سے اسلام آباد ایکسپریس وے کی طرف موڑ دیا جائے گا، جبکہ راولپنڈی سے اسلام آباد جانے والی گاڑیوں کو سکستھ روڈ سے سید پور روڈ کی طرف موڑ دیا جائے گا۔

سی ٹی او راولپنڈی نے مزید کہا کہ اسٹیڈیم روڈ، 9 نائنتھ ایونیو چوک سے ڈبل روڈ تک، میچز کے دوران ہر قسم کی ٹریفک کے لیے بند رہے گا۔ آئی جے پی روڈ اور فیض آباد کے راستے متبادل راستے فراہم کیے گئے ہیں۔

تماشائیوں کی سہولت کے لیے سول ایوی ایشن گراؤنڈ، شہباز شریف پارک اور گورنمنٹ گریجویٹ کالج سیٹلائٹ ٹاؤن میں پارکنگ کے انتظامات کیے گئے ہیں، اسٹیڈیم تک شٹل سروس بھی دستیاب ہے۔

ٹریفک اپ ڈیٹس سے متعلق معلومات کو سوشل میڈیا اور مقامی ریڈیو چینلز کے ذریعے باقاعدگی سے شیئر کیا جائے گا۔