پاکستان ماحولیاتی تحفظ ایجنسی نے وفاقی دارالحکومت اسلام آباد میں فضائی آلودگی اور سموگ کے بڑھتے خدشات کے پیش نظر ایک جامع وہیکلز ایمیشن کنٹرول ایکشن پلان متعارف کرایا ہے۔
وزارت موسمیاتی تبدیلی اور ماحولیاتی رابطہ کے ترجمان محمد سلیم شیخ کے مطابق منصوبے میں گاڑیوں سے ہونے والے دھوئیں کے اخراج کو کم کرنے، صاف ایندھن کے فروغ اور برقی گاڑیوں کے استعمال کو بڑھانے کے لیے قلیل المدتی اور طویل المدتی اقدامات شامل ہیں۔
انہوں نے بتایا کہ اسلام آباد میں گاڑیوں کے دھوئیں سے فضائی آلودگی خطرناک سطح تک پہنچ چکی ہے جس پر قابو پانے کے لیے اب وقتی مہمات کے بجائے ایک پائیدار نظام نافذ کیا جا رہا ہے۔
اس پلان میں سخت نگرانی عوامی آگاہی اور شہریوں کی شمولیت کو یقینی بنایا گیا ہے قلیل المدتی مرحلے میں پاک ای پی اے اور اسلام آباد ٹریفک پولیس مل کر گاڑیوں کی چیکنگ کریں گے تاکہ قومی ماحولیاتی معیار پر عمل درآمد یقینی بنایا جا سکے۔
تمام سرکاری گاڑیوں کے لیے نیشنل انوائرومنٹل کوالٹی اسٹینڈرڈز کی مکمل پاسداری لازمی قرار دی گئی ہے جبکہ نجی و تجارتی گاڑیوں کے لیے تھرڈ پارٹی اخراج ٹیسٹنگ شروع کی جا رہی ہے۔
حالیہ مہم میں آٹھ مقامات پر چیکنگ کے دوران 215 گاڑیوں کو جرمانے اور 32 گاڑیوں کو تحویل میں لیا گیا ترجمان کے مطابق، ڈیزل گاڑیوں، ٹرکوں اور واٹر ٹینکروں پر خصوصی توجہ دی جا رہی ہے جب کہ پٹرول گاڑیوں کے لیے کیٹالٹک کنورٹرز کا استعمال لازمی ہوگا۔
کچرا جلانے والوں کے خلاف بھی جرمانوں کا نظام سخت کیا جائے گا محمد سلیم شیخ نے کہا کہ صاف فضا کے قیام کے لیے عوامی تعاون ناگزیر ہے۔
By 
