وزیرِ اعظم یوتھ پروگرام کے تحت طلباء کو مفت لیپ ٹاپ کب ملیں گے؟ تاریخ سامنے آگئی

وزیرِ اعظم یوتھ پروگرام کے تحت طلباء کو مفت لیپ ٹاپ دینے کی مہم کا باضابطہ آغاز 30 اکتوبر 2025 کو اسلام آباد سے کیا جائے گا۔ اس اعلان کے بعد ملک بھر کے طلباء میں جوش و خروش کی لہر دوڑ گئی ہے۔

سوشل میڈیا پر جاری ایک پوسٹ میں وزیرِ اعظم یوتھ پروگرام کی جانب سے کہا گیا کہ “انتظار ختم ہونے والا ہے، تیار ہو جائیں شاندار تقسیم کے لیے، 30 اکتوبر 2025 سے اسلام آباد میں آغاز ہو رہا ہے، ہماری ٹیم جلد آپ کے علاقے میں بھی پہنچے گی۔”

یہ اعلان وزیرِ اعظم یوتھ لیپ ٹاپ اسکیم کے تحت ملک گیر تقسیم کے مرحلے کے آغاز کی نشاندہی کرتا ہے، جس کا بنیادی مقصد طلباء کو جدید ڈیجیٹل سہولیات فراہم کر کے ان کی تعلیم، تحقیق اور ہنر سازی میں مدد فراہم کرنا ہے۔

ذرائع کے مطابق، اسلام آباد میں افتتاحی تقریب کے بعد یہ مہم ملک کے دیگر علاقوں میں بھی مرحلہ وار جاری رکھی جائے گی۔ یہ منصوبہ وزیرِ اعظم یوتھ پروگرام کے اہم ترین منصوبوں میں سے ایک ہے، جس کا مقصد ڈیجیٹل خواندگی کو فروغ دینا، ٹیکنالوجی تک رسائی بہتر بنانا اور اعلیٰ تعلیمی اداروں میں زیرِ تعلیم نوجوانوں کو بااختیار بنانا ہے۔

یہ بھی پڑھیں: پاکستان کو ایک اور عالمی ادارے کی سربراہی مل گئی

حکام کے مطابق، اس مرحلے میں ہزاروں طلباء و طالبات کو فائدہ پہنچنے کی توقع ہے۔ منصوبے کے ذریعے طلباء کو نہ صرف مفت لیپ ٹاپ فراہم کیے جائیں گے بلکہ انہیں جدید ٹیکنالوجی کے استعمال کے مواقع بھی میسر آئیں گے تاکہ وہ تعلیمی میدان میں بہتر کارکردگی دکھا سکیں۔