روبیش مارکی کی کامیاب نیلامی کے بعد بحریہ ٹاؤن کی ایک اور اہم اور قیمتی جائیداد ’کلب روڈ پراپرٹی‘ بھی نیلام کر دی گئی ہے۔ اس نیلامی میں آزاد ڈیجیٹل کے چیف ایگزیکٹو آفیسر (سی ای او) اور معروف قانون دان ایڈووکیٹ مصور عباسی نے ایک بار پھر میدان مار لیا ہے۔
بدھ کو بحریہ ٹاؤن کی ’کلب روڈ پراپرٹی‘ 2 ارب 5 کروڑ روپے میں نیلام ہوئی، جسے آزاد ڈیجیٹل کے سی ای او مصور عباسی نے خرید لیا۔ نیلامی کے دوران مختلف کاروباری اور سرمایہ کار شخصیات نے حصہ لیا، تاہم شدید مقابلے کے بعد مصور عباسی نے سب سے زیادہ بولی لگا کر یہ قیمتی جائیداد اپنے نام کر لی۔
بحریہ ٹاؤن کی جانب سے کلب روڈ پر واقع یہ پراپرٹی جدید تعمیراتی خصوصیات، اعلیٰ مقام اور کاروباری اہمیت کے باعث سرمایہ کاروں کے لیے خصوصی دلچسپی کا مرکز تھی۔ نیلامی کے عمل کو شفاف طریقے سے مکمل کیا گیا جسے شرکا نے سراہا۔
مصور عباسی نے جائیداد کی خریداری کے بعد اپنے بیان میں کہا کہ ’یہ سرمایہ کاری آزاد ڈیجیٹل کے بزنس ایکسپینشن پلان کا ایک اہم حصہ ہے۔ ہمارا مقصد پاکستان میں ڈیجیٹل اور رئیل اسٹیٹ سیکٹر کو ایک دوسرے کے قریب لانا ہے تاکہ جدید کاروباری ماڈلز کو فروغ دیا جا سکے‘۔
انہوں نے مزید کہا کہ ’بحریہ ٹاؤن کی نیلامیاں نہ صرف سرمایہ کاری کے مواقع فراہم کر رہی ہیں بلکہ معیشت میں شفاف کاروباری سرگرمیوں کو بھی فروغ دے رہی ہیں۔‘
واضح رہے کہ اس سے قبل بھی روبیش مارکی کے نام سے معروف بحریہ ٹاؤن پراپرٹی کی نیلامی میں مصور عباسی نے کامیابی حاصل کی تھی، جو ان کے بڑھتے ہوئے کاروباری نیٹ ورک اور سرمایہ کاری میں دلچسپی کا ثبوت ہے۔
بحریہ ٹاؤن کی انتظامیہ کے مطابق مستقبل میں مزید جائیدادیں بھی نیلامی کے لیے پیش کی جائیں گی تاکہ کاروباری برادری کو محفوظ، شفاف اور پائیدار سرمایہ کاری کے مواقع فراہم کیے جا سکیں۔
By 
