گھر بنانا ہوا مشکل ، تعمیراتی سریے، سیمنٹ اور اینٹوں کی قیمتوں میں اضافہ

پاکستان میں موجودہ معاشی صورتحال اور بڑھتی مہنگائی نے جہاں عام صارفین کی زندگی مشکل بنا دی ہے، وہیں تعمیراتی شعبہ بھی شدید متاثر ہوا ہے۔

خاص طور پر سیلاب سے متاثرہ علاقوں میں بحالی کے کاموں کے دوران تعمیراتی میٹریل کی قیمتوں میں زبردست اضافہ متاثرین کے لیے ایک اور چیلنج بن گیا ہے۔

میڈیا رپورٹ کے مطابق ملتان کے متاثرہ علاقوں میں اینٹوں کی قیمتیں پہلے 35 ہزار روپے فی ٹرالی تھیں جو اب بڑھ کر 50 ہزار روپے تک جا پہنچی ہیں۔ ایک متاثرہ شخص نے بتایا کہ نئی اینٹوں کا ریٹ بہت بڑھ گیا ہے، اس لیے وہ پرانی اینٹیں استعمال کر کے کام کر رہے ہیں۔

یہ بھی پڑھیں : سیمنٹ سستا ہو گیا، فی بوری کی اوسط قیمت جانیے

بھٹہ مالکان کے مطابق اینٹوں کی قیمت میں اضافہ بنیادی طور پر کوئلہ اور دیگر خام مال کی بڑھتی قیمتوں کی وجہ سے ہوا ہے،  پہلے کوئلہ 9 ہزار روپے فی ٹن آتا تھا، جو اب 15 سے 16 ہزار روپے تک پہنچ گیا ہے۔

سیمنٹ کی قیمتوں میں شمالی شہروں میں گزشتہ ہفتے فی بوری اوسط 1369 روپے ریکارڈ کی گئی، جو پچھلے ہفتے 1373 روپے تھی، یعنی 0.29 فیصد کمی دیکھنے میں آئی۔ جنوبی شہروں میں سیمنٹ کی قیمت فی بوری اوسط 1441 روپے رہی، جو پچھلے ہفتے کے مطابق مستحکم رہی۔

تعمیراتی سریے کی تازہ مارکیٹ قیمتیں بھی بڑھ گئی ہیں ، مارکیٹ ذرائع کے مطابق لوکل سریے کی کم از کم قیمت 2 لاکھ 12 ہزار روپے فی ٹن اور زیادہ سے زیادہ 2 لاکھ 18 ہزار روپے فی ٹن ریکارڈ کی گئی ہے۔ شہر وار قیمتیں یوں ہیں:

کراچی: 2 لاکھ 18 ہزار روپے فی ٹن

لاہور: 2 لاکھ 16 ہزار روپے فی ٹن

ملتان: 2 لاکھ 12 ہزار روپے فی ٹن

اسلام آباد: 2 لاکھ 14 ہزار روپے فی ٹن

فیصل آباد: 2 لاکھ 12 ہزار روپے فی ٹن

برانڈڈ سریے کی قیمتیں بھی نمایاں طور پر زیادہ ہیں، کم از کم 2 لاکھ 33 ہزار روپے فی ٹن اور زیادہ سے زیادہ 2 لاکھ 42 ہزار روپے فی ٹن تک جا پہنچی ہیں۔

یہ بھی پڑھیں : سیمنٹ کی قیمتوں میں نمایاں کمی

ماہرین کے مطابق تعمیراتی میٹریل کی بڑھتی قیمتیں نہ صرف سیلاب متاثرین کے لیے مشکلات بڑھا رہی ہیں بلکہ ملک کے عام تعمیراتی شعبے پر بھی بوجھ ڈال رہی ہیں۔