نادرا کی پاک آئی ڈی ایپ میں جدید فیچرز متعارف

نادرا نے اپنی موبائل ایپلیکیشن “پاک آئی ڈی” میں مزید نئے اور جدید فیچرز شامل کر دیے ہیں، جن کی بدولت شہری اب گھر بیٹھے اہم سرکاری دستاویزات حاصل کر سکیں گے۔ اس نئی سہولت کے تحت شہری بچوں کی پیدائش، نکاح، طلاق اور ڈیتھ سرٹیفکیٹ حاصل کرنے کے قابل ہوں گے۔

نادرا نے یہ نظام لوکل گورنمنٹ پنجاب کے اشتراک سے متعارف کرایا ہے، جس کے ذریعے براہِ راست سرٹیفکیٹس کے اجراء کا عمل شروع کیا گیا ہے۔ اس کے ساتھ ساتھ شہری اب نائیکوپ، ایف آر سی، وراثتی اور چائلڈ رجسٹریشن سرٹیفکیٹ بھی ایپ کے ذریعے حاصل کر سکتے ہیں۔

اس نئی ڈیجیٹل سہولت کے بعد شہریوں کو یونین کونسلز کے چکر لگانے کی ضرورت نہیں رہے گی۔ نادرا کے مطابق مختلف سرٹیفکیٹس کے اجراء کا دائرہ کار جلد پورے پنجاب تک بڑھایا جائے گا، تاکہ زیادہ سے زیادہ لوگ اس سہولت سے فائدہ اٹھا سکیں۔

یہ بھی پڑھیں: نادرا نے فیس جمع کرانے کا طریقہ مزید آسان بنا دیا،تفصیل جانئے

نادرا حکام کا کہنا ہے کہ یہ اقدام عوام کو وقت، اخراجات اور سفری مشکلات سے نجات دلانے میں مددگار ثابت ہوگا۔ لوکل گورنمنٹ پنجاب کے تعاون سے یہ نظام شہری سہولت کے ایک نئے دور کا آغاز ہے، جو جدید ٹیکنالوجی کے استعمال سے عوامی خدمات کو مزید مؤثر بنانے کی کوشش ہے۔

نادرا کے مطابق، اس سہولت کے پہلے مرحلے کی کامیابی کے بعد منصوبہ ہے کہ اس فیچر کو ملک بھر میں وسعت دی جائے تاکہ پاکستان کے تمام شہری گھر بیٹھے اپنی ضروری دستاویزات حاصل کر سکیں۔