ملتان یونیورسٹی اور لیجنڈ انسٹیٹیوٹ کے طلبا و اساتذہ کا ملتان گیریژن کا دورہ پاک فوج کے جوانوں کو خراجِ عقیدت پیش

ملتان یونیورسٹی آف سائنس اینڈ ٹیکنالوجی اور لیجنڈ انسٹیٹیوٹ آف مینجمنٹ سائنسز کے طلبا و اساتذہ نے ہفتہ کے روز ملتان گیریژن کا مطالعاتی دورہ کیا، جس کا مقصد سول و ملٹری تعلقات میں ہم آہنگی کو فروغ دینا اور طلبا کو پاک فوج کی پیشہ ورانہ صلاحیتوں سے آگاہ کرنا تھا۔

دورے کے آغاز پر طلبا و طالبات نے یادگارِ شہدا پر حاضری دی، پھولوں کی چادر چڑھائی اور شہدا پاکستان کو خراجِ عقیدت پیش کیا۔ شرکا نے شہدا کے لیے فاتحہ خوانی کی اور اُن عظیم والدین کو سلام پیش کیا جنہوں نے اپنے بیٹے وطن کی خاطر قربان کیے۔

یہ بھی پڑھیں:ڈی جی آئی ایس پی آر کا بلوچستان یونیورسٹی آف آئی ٹی، انجینئرنگ اینڈ مینجمنٹ سائنسز کوئٹہ کا دورہ

بعدازاں طلبا کو اسالٹ کورس، فائرنگ کے طریقہ کار اور جدید ٹینکوں و دفاعی آلات کے بارے میں عملی طور پر آگاہی فراہم کی گئی۔ فوجی افسران نے جدید عسکری مشقوں، ہتھیاروں کے استعمال اور پاک فوج کی آپریشنل تیاریوں سے متعلق تفصیلی بریفنگ دی۔

دورے کے دوران طلبا و اساتذہ نے پاک فوج کے پیشہ ورانہ معیار اور بہادری کو سراہتے ہوئے اپنے خیالات کا اظہار کیا۔ ایک طالبہ نے کہاکہ ’ہم شہدا کے عظیم والدین کو سلام پیش کرتے ہیں جنہوں نے اپنے بیٹے اس ملک پر قربان کیے۔‘ ایک اور طالبہ نے کہا کہ ’میں پاک فوج کی شکر گزار ہوں جن کی قربانیوں سے آج ہم آزاد فضاؤں میں سانس لے رہے ہیں۔‘

طلبا و طالبات نے پاک فوج کے عملی مظاہرے کو سراہتے ہوئے کہا کہ، ’آج فوج نے ہمیں اپنی مختلف تربیتی مشقیں اور جدید دفاعی آلات کا شاندار مظاہرہ دکھایا۔ یہ لمحہ ہمارے لیے فخر کا باعث ہے۔‘

ایک طالبہ نے کہا کہ، ’پاک فوج ہر دشمن کا بہادری سے مقابلہ کرنے کی صلاحیت رکھتی ہے، جس کی واضح مثال آپریشن بنیانُ مرصوص ہے۔ مستقبل میں بھی اگر کوئی پاکستان کے خلاف آنکھ اٹھائے گا تو پاک فوج اسے بھرپور اور کڑا جواب دے گی۔‘

ایک طالب علم نے کہا کہ، ’پاک فوج کا اصل امتیاز اس کا اعلیٰ اور غیر معمولی پیشہ ورانہ معیار ہے۔ یہ وہ فورس ہے جو ہر حال میں ملک کے دفاع کے لیے تیار رہتی ہے۔‘

مزید پڑھیں:ڈی جی آئی ایس پی آر کا کیڈٹ کالج پلندری کا دورہ، کشمیری طلبا و اساتذہ کا پاک فوج سے والہانہ اظہار یکجہتی

اساتذہ نے بھی اپنے خیالات کا اظہار کرتے ہوئے کہا کہ، ’پاکستان آرمی کے جوان بے لوث جذبے سے وطن کے دفاع میں ہمہ وقت مصروفِ عمل ہیں۔ ہم بہادر فوجی جوانوں کو سلام پیش کرتے ہیں اور ان کے جذبۂ قربانی کو خراجِ تحسین پیش کرتے ہیں۔‘

دورے کے اختتام پر طلبا و طالبات نے پاکستان کی مسلح افواج کے ساتھ اظہارِ یکجہتی کیا اور اس عزم کا اعادہ کیا کہ وہ ملک کے دفاع، ترقی اور استحکام کے لیے اپنی خدمات پیش کرتے رہیں گے۔