تمام سیاسی قوتوں کو امن کے لیے مسلح افواج کیساتھ کھڑا ہونا چاہیے، فیصل کنڈی کی وزیراعلیٰ خیبرپختونخوا کے بیان کی مذمت

گورنر خیبرپختونخوا فیصل کریم کنڈی نے نومنتخب وزیراعلیٰ سہیل آفریدی کے مسلح افواج سے متعلق بیان کی شدید مذمت کی ہے  ۔

سوشل میڈیا پر جاری ایک بیان میں گورنر خیبرپختونخوا فیصل کریم کنڈی  نے کہا کہ میں کسی بھی ایسی بیان بازی کی مذمت کرتا ہوں جو مسلح افواج کے وقار اور قربانیوں کو مجروح کرنے کی کوشش کرے،  ہماری سرزمین کے بہادر بیٹے ہمارے صوبے کی حفاظت کے لیے اپنی جانیں نچھاور کرتے ہیں ، ان کے عزم و ارادے پر سنسنی خیز انداز میں سوال اٹھانا نہ صرف ان کے حوصلے کو نقصان پہنچاتا ہے بلکہ عوامی تحفظ کو بھی خطرے میں ڈالتا ہے۔

I condemn any rhetoric that seeks to undermine the honour and sacrifice of our armed forces. The brave sons of our soil lay down their lives to protect our province — questioning their intent in sensational terms only damages morale and public safety. Intelligence based… pic.twitter.com/kMj0OamaOl

— Faisal Karim Kundi (@fkkundi) November 7, 2025

ان کاکہنا تھا کہ انٹیلی جنس پر مبنی آپریشنز ماضی میں بھی ضروری رہے ہیں اور آئندہ بھی ہمارے لوگوں کے تحفظ کے لیے ناگزیر رہیں گے ،  ان کا واحد مقصد عام شہریوں کی حفاظت اور امن کی بحالی ہے ، سیاسی بحث و مباحثہ اس حد تک نہیں جانا چاہیے کہ وہ ہمارے سکیورٹی اداروں کو کمزور کرے۔

یہ خبر بھی پڑھیں :سہیل آفریدی 9 مئی کو کور کمانڈر ہاوس لاہور پر حملے میں شامل تھے، اختیار ولی خان نے ویڈیو چلا دی

فیصل کریم کنڈی نے مزید کہا کہ وزیراعلیٰ کے پی کو تحمل کا مظاہرہ کرنا چاہیے اور صوبے کے تحفظ و اتحاد کو سیاسی مفادات پر فوقیت دینی چاہیے۔

ان کاکہنا تھا کہ  موجودہ سکیورٹی صورتحال کا تقاضا ہے کہ تمام سیاسی قوتیں ہماری مسلح افواج کے ساتھ کھڑی ہوں تاکہ ہمارے لوگوں کے لیے دیرپا امن و استحکام کو یقینی بنایا جا سکے۔ بالآخر، آنے والے انتخابات میں عوام ہی احتساب کرینگے ۔