پاکستانی طلباء کے لئے خوشخبری ، چینی حکومت کا فنڈڈ اسکالرشپس کا اعلان

چائنیز اسکالرشپ کونسل نے تعلیمی سال 2026–2027 کے لیے پاکستانی طلباء کے لیے 75 مکمل فنڈڈ اسکالرشپس کا اعلان کیا ہے۔ یہ اسکالرشپس بی ایس، ایم ایس، اور پی ایچ ڈی کے طلباء کے لیے دستیاب ہوں گی۔ اس اقدام کا مقصد حکومتِ چین اور پاکستان کے درمیان تعلیمی تعاون کو مزید فروغ دینا ہے۔

اس پروگرام کے تحت ہائر ایجوکیشن کمیشن (HEC) پاکستان کو سرکاری نامزدگی دینے والا ادارہ مقرر کیا گیا ہے، جو اہل امیدواروں کی شارٹ لسٹنگ اور سفارشات کی ذمہ داری ادا کرے گا۔

چائنیز اسکالرشپ کونسل کے ذریعے منتخب طلباء کو مختلف مضامین میں انڈرگریجویٹ، ماسٹرز، اور پی ایچ ڈی کی تعلیم حاصل کرنے کا موقع ملے گا۔ تمام طلباء کے لیے ایک سالہ چینی زبان کا تیاری کورس لازمی قرار دیا گیا ہے، جبکہ ماسٹرز اور پی ایچ ڈی امیدواروں کے لیے تدریسی پروگرامز چینی اور انگریزی دونوں زبانوں میں دستیاب ہوں گے۔

چائنیز اسکالرشپ کونسل اسکالرشپ حاصل کرنے والے طلباء کو مکمل مالی امداد فراہم کرے گی، جس میں ٹیوشن فیس، رہائش، اور ماہانہ وظیفہ شامل ہے۔ میزبان یونیورسٹی تعلیم، انتظامی اخراجات اور ہیلتھ انشورنس کی مکمل ذمہ داری ادا کرے گی، جبکہ طلباء کو یونیورسٹی ہاسٹل یا رہائشی سہولت بھی مفت فراہم کی جائے گی۔

اہلیت کے مطابق درخواست دہندگان کو پاکستانی یا آزاد جموں و کشمیر (AJK) کا شہری ہونا ضروری ہے۔ دوہری شہریت رکھنے والے، یا وہ امیدوار جو آخری تاریخ تک اپنی ڈگری مکمل نہیں کرتے، اہل نہیں ہوں گے۔ درخواست دہندگان کو صحت مند ہونا اور چائنیز اسکالرشپ کونسل و منتخب یونیورسٹی کی تمام تعلیمی و لسانی شرائط پوری کرنا لازمی ہے۔

یہ بھی پڑھیں: پاکستانی طلبہ کے لئے خوشخبری، روس کی جانب سے ’’فل فنڈڈ اسکالرشپ پروگرام ‘‘ کا اعلان

مزید برآں، کسی دوسرے اسکالرشپ کے حامل امیدوار درخواست نہیں دے سکیں گے۔ بی ایس پروگرام کے لیے USAT اور ایم ایس یا پی ایچ ڈی کے لیے HAT ٹیسٹ کے درست اسکور جمع کرانا لازم ہوگا۔ میڈیکل، انجینئرنگ، قانون، آرکیٹیکچر اور ویٹرنری فیلڈز میں درخواست دینے والوں کے لیے متعلقہ پیشہ ورانہ کونسل سے منظوری (Accreditation) لازمی ہوگی، جبکہ میڈیکل طلباء کو PMDC کی غیر ملکی داخلہ پالیسی پر عمل کرنا ہوگا۔

درخواست دہندگان کو دو الگ آن لائن درخواستیں جمع کرانی ہوں گی — ایک HEC پورٹل پر اور دوسری چائنیز اسکالرشپ کونسل کے پورٹل پر۔ کسی ایک درخواست کی عدم جمع کرانے کی صورت میں امیدوار نااہل قرار دیا جائے گا۔

درخواست جمع کرانے کی آخری تاریخ پیر، 5 جنوری 2026 شام 4:00 بجے (پاکستان اسٹینڈرڈ ٹائم) مقرر کی گئی ہے۔ مزید معلومات یا تکنیکی رہنمائی کے لیے امیدوار HEC کے آن لائن ہیلپ پورٹل پر جا سکتے ہیں یا 051-111-119-432 اور 0334-111-9432 پر رابطہ کر سکتے ہیں۔