نادرا کا شادی شدہ شہریوں کے لیے اہم اعلان

نیشنل ڈیٹا بیس اینڈ رجسٹریشن اتھارٹی (نادرا) نے شادی شدہ شہریوں کے لیے اہم اعلامیہ جاری کرتے ہوئے خبردار کیا ہے کہ جن افراد نے اپنی ازدواجی حیثیت نادرا کے ریکارڈ میں اپ ڈیٹ نہیں کرائی، وہ مستقبل میں قانونی پیچیدگیوں کا سامنا کر سکتے ہیں۔

تفصیلات کے مطابق نادرا کی جانب سے جاری بیان میں کہا گیا ہے کہ تمام شادی شدہ شہری اپنی ازدواجی حیثیت (Marital Status) کو فوری طور پر نادرا کے ڈیٹا بیس میں درست کروائیں تاکہ آئندہ کسی بھی قانونی یا سرکاری امور میں مشکلات پیش نہ آئیں۔

نادرا کے ترجمان کے مطابق یہ مشاہدہ کیا گیا ہے کہ متعدد افراد نے اپنی شادیوں کا اندراج اگرچہ یونین کونسل میں کروا رکھا ہے، لیکن ان کی ازدواجی حیثیت اب تک نادرا کے ریکارڈ میں اپ ڈیٹ نہیں ہوئی۔ اس غفلت کے باعث بعض مواقع پر شہریوں کو سرکاری معاملات میں دشواری کا سامنا کرنا پڑ سکتا ہے۔

ترجمان نے مزید وضاحت کرتے ہوئے کہا کہ شہری قریبی نادرا سینٹر جا کر اپنی ازدواجی حیثیت کو بآسانی درست کروا سکتے ہیں۔ یہ اقدام نادرا کے جاری منصوبے کا حصہ ہے، جس کا مقصد شہریوں کے ڈیٹا کو زیادہ درست، مکمل اور جدید بنانا ہے تاکہ سرکاری ریکارڈ کی شفافیت برقرار رہے۔

یہ بھی پڑھیں: ’اپنی چھت، اپنا گھرپروگرام‘ حکومت کا قرض جلد واپس کرنے والوں کے لیے خصوصی مراعات کا اعلان

نادرا نے شہریوں کی سہولت کے لیے ایک نئی ایس ایم ایس سروس بھی متعارف کرائی ہے، جس کے ذریعے شادی شدہ افراد کو اپنی ازدواجی حیثیت اپ ڈیٹ کرنے کے بارے میں آگاہی فراہم کی جا رہی ہے۔

ترجمان کے مطابق مزید معلومات اور رہنمائی کے لیے شہری نادرا کی ہیلپ لائن 1777 (موبائل صارفین کے لیے) یا 051-111-786-100 پر رابطہ کر سکتے ہیں، جب کہ تفصیلات کے لیے نادرا کی آفیشل ویب سائٹ www.nadra.gov.pk بھی دیکھی جا سکتی ہے۔

نادرا نے یہ بھی واضح کیا کہ شناختی کارڈ پر ازدواجی حیثیت اپ ڈیٹ کروانے کی فیس 100 روپے مقرر کی گئی ہے، تاہم شہریوں کو اس عمل کے لیے اپنا نکاح نامہ یا شادی کا سرٹیفکیٹ لازمی طور پر جمع کرانا ہوگا۔