ڈرائیونگ لائسنس حاصل کریں صرف ایک دن میں، تفصیل اور طریقہ کار جانئے

سٹی ٹریفک پولیس راولپنڈی نے شہریوں کے لیے ایک اہم سہولت متعارف کرائی ہے جس کے تحت موٹر سائیکل سوار اب ایک ہی دن میں اپنا لرنر اور مستقل ڈرائیونگ لائسنس حاصل کر سکتے ہیں۔ اس اقدام کا مقصد شہریوں کو آسانی فراہم کرنا اور لائسنس کے اجرا کے عمل کو تیز بنانا ہے۔

تفصیلات کے مطابق نئے نظام کے تحت موٹر سائیکل سوار ایک ہی دن میں تحریری اور عملی (ڈرائیونگ) ٹیسٹ دے سکتے ہیں، اور جو امیدوار دونوں امتحانات کامیابی سے پاس کر لیتے ہیں انہیں اسی روز مستقل ڈرائیونگ لائسنس جاری کر دیا جاتا ہے۔ اس اقدام سے روزانہ سفر کرنے والے شہریوں کو نمایاں سہولت حاصل ہوئی ہے۔

یہ نیا نظام چیف ٹریفک آفیسر (سی ٹی او) راولپنڈی فرحان اسلم کی ہدایت پر متعارف کرایا گیا ہے جو پنجاب کے ڈپٹی انسپکٹر جنرل ٹریفک وقاص نذیر کے وژن کا حصہ ہے۔ سٹی ٹریفک پولیس (سی ٹی پی) کے ترجمان نے بتایا کہ یہ اصلاحات ضلع بھر کے 13 لائسنسنگ سینٹرز میں لائسنس کے اجرا کے عمل کو مزید مؤثر اور شفاف بنانے کے لیے کی گئی ہیں۔

یہ بھی پڑھیں: ڈرائیونگ لائسنس بنوانے کےلئے اب ٹریفک پولیس کے دفتر جانے کی بھی ضرورت نہیں

ترجمان کے مطابق نئے نظام کے آغاز کے بعد سے صرف گزشتہ ایک ماہ کے دوران 20 ہزار 500 سے زائد موٹر سائیکل لائسنس جاری کیے گئے ہیں، جو نظام کی کامیابی اور شہریوں کے اعتماد کا مظہر ہے۔ حکام نے زور دیا کہ درست ڈرائیونگ لائسنس کے بغیر گاڑی چلانا ایک قانونی جرم ہے، اس لیے شہریوں سے اپیل کی گئی ہے کہ وہ بروقت لائسنس حاصل کریں تاکہ جرمانے یا کسی بھی قانونی کارروائی سے بچا جا سکے۔

سی ٹی او فرحان اسلم نے مزید بتایا کہ اس سلسلے میں ایک آگاہی مہم بھی جاری ہے جس کا مقصد شہریوں کو درست اور قانونی ڈرائیونگ لائسنس رکھنے کی اہمیت سے آگاہ کرنا ہے۔ ان کے مطابق کسی ڈرائیور کا اعتماد اور ٹریفک قوانین کی پاسداری اس کے مکمل اور درست قانونی دستاویزات سے ظاہر ہوتی ہے۔

سی ٹی پی کے مطابق لائسنس کے اجرا کا عمل مختلف مراکز کے ذریعے انجام دیا جا رہا ہے جو پنجاب حکومت کے آن لائن لائسنسنگ سسٹم سے منسلک ہیں تاکہ درخواست، ٹیسٹ اور لائسنس کے اجرا کے عمل کو جدید، تیز اور مؤثر بنایا جا سکے۔