نیشنل سیونگز سینٹر (این ایس سی) نے 1500 روپے مالیت کے پرائز بانڈز کی قرعہ اندازی کی تاریخ کا باضابطہ اعلان کر دیا ہے۔ ادارے کے مطابق یہ قرعہ اندازی 17 نومبر 2025 کو راولپنڈی میں منعقد کی جائے گی، جس میں ملک بھر سے ہزاروں کی تعداد میں افراد شرکت کریں گے۔
نیشنل سیونگز سینٹر کی جانب سے جاری بیان میں کہا گیا ہے کہ قرعہ اندازی میں کامیاب ہونے والے خوش نصیب افراد اپنی انعامی رقم اسٹیٹ بینک بی ایس سی کے فیلڈ دفاتر، منتخب کمرشل بینکوں یا نیشنل سیونگز سینٹرز سے مقررہ فارم جمع کروا کر حاصل کر سکتے ہیں۔
بیان کے مطابق 1500 روپے مالیت کے پرائز بانڈز کے انعامات کی تفصیلات درج ذیل ہیں:
پہلا انعام 30 لاکھ روپے کا ایک ہوگا، دوسرا انعام 10 لاکھ روپے کے تین انعامات پر مشتمل ہوگا، جب کہ تیسرا انعام 18,500 روپے مالیت کا ہوگا جو 1,696 خوش نصیب افراد میں تقسیم کیا جائے گا۔
اسٹیٹ بینک کے مطابق انعامی رقم پر ٹیکس کی کٹوتی بھی کی جائے گی۔ فائلرز کے لیے 15 فیصد اور نان فائلرز کے لیے 30 فیصد ٹیکس لاگو ہو گا۔ اس طرح ٹیکس فائلرز کو انعامی رقم میں نسبتاً کم کٹوتی کا سامنا کرنا پڑے گا۔
پچھلی قرعہ اندازی، جو اگست 2025 میں منعقد ہوئی تھی، میں 30 لاکھ روپے کا پہلا انعام بانڈ نمبر 790468 نے جیتا تھا۔ اسی قرعہ اندازی میں 10 لاکھ روپے کے تین دوسرے انعامات بانڈ نمبر 031085، 193673 اور 607650 کے نام رہے، جب کہ مزید 1,696 افراد کو 18,500 روپے کے انعامات دیے گئے تھے۔
ماہرین کے مطابق پاکستانی عوام انعامی بانڈز کو ایک محفوظ اور منافع بخش سرمایہ کاری تصور کرتے ہیں۔ ان کے مطابق انعامی بانڈز میں سرمایہ نہ صرف محفوظ رہتا ہے بلکہ اس کے ذریعے بڑے انعامات جیتنے کا موقع بھی میسر آتا ہے۔ یہی وجہ ہے کہ عوام کی بڑی تعداد ہر قرعہ اندازی میں دلچسپی کے ساتھ حصہ لیتی ہے۔
نیشنل سیونگز سینٹر کی جانب سے توقع ظاہر کی جا رہی ہے کہ رواں قرعہ اندازی میں بھی شہریوں کی بڑی تعداد اپنی قسمت آزمائے گی، جب کہ ادارے نے انعامات کے حصول کے لیے تمام شرائط اور ٹیکس کٹوتیوں سے متعلق آگاہی فراہم کر دی ہے تاکہ تمام شرکاء باآسانی اپنی انعامی رقم حاصل کر سکیں۔
By 
