رمضان المبارک کب سے شروع ہوگا؟ متوقع تاریخ سامنے آگئی

دنیا بھر کے مسلمان شدت سے بابرکت مہینے رمضان المبارک کے آغاز کا انتظار کر رہے ہیں، جو عبادت، روزے اور رحمتوں سے بھرپور مہینہ سمجھا جاتا ہے۔ ہر مسلمان اس ماہ کی آمد کے لیے بے صبری سے چاند دیکھنے کا منتظر رہتا ہے، کیونکہ رمضان کا آغاز ماہِ صیام کے چاند نظر آنے پر منحصر ہوتا ہے۔

رمضان اسلامی کیلنڈر کا نواں مہینہ ہے، جس میں مسلمان سحر سے افطار تک روزہ رکھتے ہیں اور زیادہ سے زیادہ عبادت، دعا اور خیرات میں مشغول رہتے ہیں۔ اس ماہ کی اہمیت کے پیش نظر مسلمان روحانی پاکیزگی اور تقویٰ کی جانب توجہ مرکوز کرتے ہیں۔

دبئی کے اسلامک افیئرز اینڈ چیریٹیبل ایکٹیویٹیز ڈیپارٹمنٹ (IACAD) کے مطابق رمضان المبارک 2026 کا آغاز 17 سے 19 فروری کے درمیان متوقع ہے۔ زیادہ امکان ظاہر کیا جا رہا ہے کہ پہلا روزہ جمعرات، 19 فروری 2026 کو رکھا جائے گا، تاہم حتمی فیصلہ چاند نظر آنے کے بعد ہی کیا جائے گا۔

ماہرین فلکیات کے مطابق رمضان المبارک 2026 کا اختتام جمعرات، 19 مارچ 2026 کو متوقع ہے۔ چونکہ اسلامی مہینے 29 یا 30 دن کے ہوتے ہیں، اس لیے ایک یا دو دن کا فرق ممکن ہے۔

یہ بھی پڑھیں: سعودی عرب میں پاکستانی خواتین نرسوں کے لیے ملازمتوں کے مواقع، اپلائی کرنے کا طریقہ جانئے

رمضان کے اختتام کے بعد مسلمان عیدالفطر مناتے ہیں، جو خوشی اور شکرانے کا تہوار ہے اور روزوں کے مکمل ہونے کی علامت سمجھا جاتا ہے۔ اگلے سال متحدہ عرب امارات میں عیدالفطر 20 مارچ (جمعہ) کو آنے کا امکان ہے، اور ممکن ہے کہ اس کے ساتھ سال کا پہلا لمبا ‘ویک اینڈ’ بھی شامل ہو۔

امارات میں عیدالفطر کے موقع پر شوال کے پہلے تین دن سرکاری تعطیلات دی جاتی ہیں۔ تاہم اگر رمضان 30 دن پر محیط ہوا تو سرکاری تعطیلات میں اضافے کا امکان بھی موجود ہے، تاکہ عوام زیادہ سے زیادہ دنوں تک عید کی خوشیاں مناسکیں۔

یہ مہینہ نہ صرف عبادت و روحانی تقویٰ کا سبب ہے بلکہ مسلم کمیونٹی کے لیے باہمی محبت، خیرات اور سماجی خدمات کو فروغ دینے کا موقع بھی فراہم کرتا ہے، جس کے ذریعے رمضان کا بابرکت پیغام ہر گھر اور معاشرے تک پہنچتا ہے۔