نادرا نے دستاویزات کی گھر فراہمی کےلئے بائیکر سروس متعارف کرادی

نیشنل ڈیٹا بیس اینڈ رجسٹریشن اتھارٹی (نادرا) نے گھر پر شناختی کارڈ اور دیگر دستاویزات پہنچانے والی بائیکر سروس کی تفصیلات جاری کر دی ہیں، جس کا مقصد شہریوں کو سہولت فراہم کرنا اور نادرا سینٹرز پر طویل قطاروں کو کم کرنا ہے۔

نادرا کے مطابق یہ سروس اس وقت اسلام آباد، راولپنڈی، ٹیکسلا، واہ کینٹ، لاہور، کراچی، حیدرآباد اور میرپورخاص میں دستیاب ہے۔ بائیکر سروس ہفتے کے ساتوں دن صبح 9 بجے سے شام 7 بجے تک فعال رہے گی تاکہ شہری آسانی سے اپنے شناختی کارڈ اور دیگر نادرا سے متعلق دستاویزات حاصل کر سکیں۔

اس سروس کے تحت شہری اپنے گھر پر ہی شناختی کارڈز، بائیو میٹرک دستاویزات اور دیگر نادرا کے متعلقہ کاغذات وصول کر سکیں گے۔ گھر پر ترسیل کی فیس مجموعی طور پر 1,000 روپے مقرر کی گئی ہے، جس میں 850 روپے سروس چارجز اور 150 روپے ڈیلیوری چارجز شامل ہیں۔ نادرا نے یہ بھی واضح کیا ہے کہ فیس میں فرق متعلقہ دستاویز کی نوعیت کے مطابق ہو سکتا ہے۔

بائیکر سروس کے لیے شہری درج ذیل نمبرز پر رابطہ کر کے رائیڈر بُک کر سکتے ہیں:
لینڈ لائن: 051-111-786-100
موبائل: 1777

یہ بھی پڑھیں: نادرا کا اہم اقدام ، شناختی کارڈ بنوانے والوں کیلئے بڑی خوشخبری

نادرا کا کہنا ہے کہ یہ سروس نہ صرف شناختی کارڈ کی تجدید یا نئی درخواست کے عمل کو آسان بنائے گی بلکہ بزرگ شہریوں اور مصروف افراد کے لیے بھی ایک بڑی سہولت ہے۔ شہری اب نادرا کے سینٹرز پر لمبی قطاروں میں انتظار کیے بغیر اپنے گھر بیٹھے اپنی دستاویزات حاصل کر سکتے ہیں۔

ماہرین کا کہنا ہے کہ اس اقدام سے نہ صرف عوام کو وقت کی بچت ہوگی بلکہ نادرا کے عملے پر بھی دباؤ کم ہوگا اور پورا عمل زیادہ منظم اور تیز رفتار بن جائے گا۔ بائیکر سروس کے ذریعے شناختی کارڈ کی فراہمی میں شفافیت اور سہولت کو یقینی بنایا جا رہا ہے تاکہ ہر شہری بلا جھنجھٹ اپنی دستاویزات حاصل کر سکے۔