سعودی عرب میں بارشوں سے متعلق اہم پیش گوئی

سعودی عرب میں موسمیات کے قومی مرکز کے ترجمان حسین القحطانی نے آفیشل اکاؤنٹ پر کہا ہے کہ مملکت کے مختلف علاقوں میں جمعہ سے پیر تک بارش کا امکان ہے لہٰذا مملکت میں رہنے والے تمام لوگ متعلقہ اداروں کی ہدایات پر عملدرآمد کریں اور موسم کے حوالے سے تازہ معلومات کے لیے موسمیات کے قومی مرکز کے اعلانات سے آگاہ رہیں۔

 دوسری جانب سعودی عرب میں خشک سالی کے خاتمے اور بارش کی دعا کے لیے آج ملک بھر میں نمازِ استسقا ادا کی جا رہی ہے، خادمِ حرمین شریفین شاہ سلمان بن عبدالعزیز کے شاہی فرمان کے تحت شہری اور غیرملکی مسلمان اللہ کے حضور بارش کے لیے دعائیں کریں گے۔

یہ بھی پڑھیں:پنجاب میں 5 ستمبر تک مزید بارشوں کا امکان، دریاؤں میں شدید سیلاب کا خدشہ

 سعودی عرب میں خشک سالی کے خاتمے کے لیے آج ملک بھر میں نمازِ استسقا کے اجتماعات منعقد کیے جا رہے ہیں۔ یہ اجتماعات خادمِ حرمین شریفین شاہ سلمان بن عبدالعزیز کے شاہی فرمان کے مطابق منعقد کیے جا رہے ہیں۔

سعودی وزارتِ مذہبی امور کے مطابق نمازِ استسقا طلوعِ آفتاب کے تقریباً 15 منٹ بعد ادا کی جائے گی، جس میں عوام، سرکاری عہدیداران اور غیر ملکی مقیم افراد بڑی تعداد میں شریک ہوں گے۔

 ملک بھر کی 12 ہزار سے زیادہ مساجد میں نمازِ استسقا کے خصوصی اجتماعات کا اہتمام کیا گیا ہے، جہاں نمازی اللہ تعالیٰ سے بارش کے نزول اور رحمت کی دعا کریں گے۔

مزید پڑھیں:پاکستان میں مون سون کی تباہ کاریاں جاری، مزید بارشوں کا امکان، 670 افراد جاں بحق ہوئے، حکومت اور فوج کی مشترکہ پریس کانفرنس

 سب سے بڑے اجتماعات مسجد الحرام مکہ مکرمہ اور مسجد نبویؐ مدینہ منورہ میں ہوں گے، جہاں لاکھوں فرزندانِ اسلام خشوع و خضوع کے ساتھ اللہ تعالیٰ کے حضور سربسجود ہو کر دعا کریں گے۔

 خیال رہے کہ سعودی عرب میں نمازِ استسقا سنتِ نبویؐ کے مطابق اس وقت ادا کی جاتی ہے جب بارش کا سلسلہ طویل عرصے تک رک جائے اور ملک خشک سالی کا شکار ہو۔