معرکہ حق میں پاکستان کے ہاتھوں ہزیمت، بھارت نئے اسرائیلی میزائل خریدنے کیلئے کوشاں

معرکہ حق میں پاکستان کے ہاتھوں ہزیمت اٹھانے کے بعد بھارت نئے اسرائیلی میزائلوں کی خریداری اور تیاری میں دلچسپی ظاہر کرنے لگا۔

اسرائیلی میڈیا کی رپورٹس کے مطابق اسرائیل کی وزارتِ دفاع کے ڈائریکٹر جنرل جنرل (ر) امیر بارام نے گزشتہ ہفتے بھارتی ہم منصب راجیش کمار سنگھ کے ساتھ دفاعی تعاون کو مضبوط بنانے کے لیے ایک مفاہمتی یادداشت پر دستخط کیے۔

اسرائیلی میڈیا نے بھارتی دفاعی ویب سائٹ کا حوالہ دیتے ہوئے کہا کہ اس یادداشت کے بعد دفاعی تعلقات میں مزید پیش رفت سامنے آئی اور بھارتی وزارتِ دفاع کے ایک وفد نے حال ہی میں اسرائیل کا دورہ کیا۔

رپورٹس کے مطابق دورے کا مقصد ایسے معاہدوں کو حتمی شکل دینا تھا جن کے تحت بھارت نہ صرف اسرائیل ایروسپیس انڈسٹریز (آئی اے آئی) کے ایئر لانگ رینج آرٹلری (Air LORA) بلیسٹک میزائل اور رافیل ایڈوانسڈ ڈیفنس سسٹمز کے آئس بریکر (Ice Breaker) کروز میزائل خرید سکے گا بلکہ انہیں مقامی طور پر تیار بھی کرے گا۔

مزید پڑھیں: سرینگر کے نوگام پولیس اسٹیشن میں امونیم نائٹریٹ کی فرانزک کے دوران دھماکہ : بھارتی میڈیا

آئی اے آئی کے تیار کردہ Air LORA میزائل کا استعمال میزائل سائٹس، فوجی اڈوں اور ائیر ڈیفنس سسٹمز کو نشانہ بنانے کے لیے کیا جاتا ہے، 400 کلومیٹر رینج کا حامل یہ میزائل 1600کلوگرام وزنی ہے جو سپر سانک رفتار سے اڑتا ہے۔

خیال رہے کہ اسٹاک ہوم انٹرنیشنل پیس ریسرچ انسٹیٹیوٹ (SIPRI) کے مطابق بھارت، اسرائیلی دفاعی صنعتوں کا سب سے بڑا خریدار ہے اور 2020 سے 2024 کے دوران اسرائیل کی مجموعی دفاعی برآمدات کا تقریباً 34 فیصد بھارت پہنچا۔