مدینہ سمیت سعودیہ بھر میں شدید بارشیں، سیلاب کا الرٹ جاری

سعودی نیشنل سینٹر فار میٹالوجی نے ملک بھر میں جاری خراب موسم کے پیشِ نظر شدید بارشوں اور ممکنہ فلیش فلڈ کے حوالے سے انتباہ جاری کیا ہے۔

سعودی محکمۂ موسمیات کے مطابق جمعہ سے منگل تک سعودی عرب کے متعدد علاقوں میں گرج چمک کے ساتھ موسلادھار بارشوں کا سلسلہ جاری رہنے کا امکان ہے، جس سے نشیبی مقامات پر پانی جمع ہونے اور سیلابی صورتحال پیدا ہونے کا خدشہ ہے۔

تازہ ترین موسمی پیشگوئی کے مطابق یہ بارشیں مکہ، جدہ، مدینہ، تبوک، الجوف، شمالی سرحدی علاقہ، حائل، القصیم، ریاض، مشرقی صوبہ، الباحہ، عسیر اور جازان سمیت ملک کے وسیع حصوں کو متاثر کریں گی۔

حکام نے شہریوں کو مشورہ دیا ہے کہ وہ مستند سرکاری ذرائع سے موسم کی تازہ ترین معلومات حاصل کرتے رہیں، سیلابی صورتحال کا خطرہ رکھنے والی وادیوں سے دور رہیں اور کم حدِ نگاہ کے دوران ڈرائیونگ میں خصوصی احتیاط برتیں۔

واضح رہے کہ سعودی عرب میں خشک سالی کے خاتمے اور بارانِ رحمت کے لئے ملک بھر میں نمازِ استسقاء ادا کی  گئی تھی ، جس کی برکات نے پورے ملک کو فیضیاب کیا ۔

یہ بھی پڑھیں : سعودی عرب میں بارشوں سے متعلق اہم پیش گوئی

دوسری جانب، مدینہ منورہ اور نواحی علاقوں میں موسمِ سرما کی پہلی بارش نے فضا کو خوشگوار بنا دیا ،  کئی علاقوں میں گرج چمک کے ساتھ خوب بارش ہوئی جس کے بعد سردی کی شدت میں اضافہ ہوگیا۔

مسجد نبویؐ میں بھی ابررحمت برسی جبکہ گنبدِ خضریٰ پر برسنے والی بارش کے مناظر زائرین کے لیے روح پرور ثابت ہوئے ،  زائرین نے بارش کے دوران اللہ تعالی کا شکر ادا کیا اور دعائیں کیں۔

محکمۂ موسمیات کا کہنا ہے کہ بارشوں کی شدت مختلف علاقوں میں مختلف ہوسکتی ہے، جبکہ بعض خطوں میں شدید موسمی حالات کے باعث عارضی رکاوٹیں اور پانی بھرسکتا ہے۔

سعودی حکام کے مطابق تمام متعلقہ ادارے ہائی الرٹ پر ہیں اور کسی بھی ہنگامی صورتحال سے نمٹنے کے لیے پوری طرح تیار ہیں ،  عوام کو ہدایت کی گئی ہے کہ وہ اپنی حفاظت کو ترجیح دیں اور سرکاری ہدایات پر مکمل عمل کریں۔