سابق قومی کپتان سرفراز احمد کو پاکستان کرکٹ بورڈ (پی سی بی) میں اہم ذمہ داریاں تفویض کر دی گئی ہیں۔ ذرائع کے مطابق پی سی بی نے سرفراز احمد کو پاکستان شاہینز اور انڈر 19 کرکٹ ٹیموں کا انچارج مقرر کیا ہے، جس کے تحت وہ جونیئر اور ایمرجنگ سطح کی ٹیموں سے متعلق مختلف اہم معاملات میں اپنی رائے، نگرانی اور تجربہ فراہم کریں گے۔
ان کی ذمہ داریوں میں دونوں ٹیموں کے کوچنگ پینل اور مجوزہ دوروں کے حوالے سے فیڈ بیک دینا بھی شامل ہوگا، جس کا براہِ راست مقصد نوجوان کرکٹرز کی عملی اور تکنیکی تربیت کو بہتر بنانا ہے۔
ذرائع کے مطابق سرفراز احمد پی سی بی کے ساتھ بطور کنسلٹنٹ معاہدے میں ہیں، جس کے تحت وہ ٹیموں کے ساتھ غیر ملکی دوروں پر بھی سفر کر سکیں گے۔ اس کے علاوہ جب ملک میں ٹریننگ کیمپ یا سیریز کا انعقاد ہوگا تو وہ ان مواقع پر بھی اسکواڈ کے ہمراہ موجود رہیں گے اور کھلاڑیوں کی رہنمائی کے لیے اپنا تجربہ اور تجاویز فراہم کریں گے۔ سرفراز کے وسیع بین الاقوامی تجربے کو مدنظر رکھتے ہوئے پی سی بی کا ماننا ہے کہ ان کی موجودگی نوجوان کھلاڑیوں کی بہتری اور پیشہ ورانہ grooming کے لیے نہایت مفید ثابت ہوگی۔
پاکستان کرکٹ بورڈ نے یہ فیصلہ نوجوان کھلاڑیوں کی بہتر رہنمائی اور مستقبل کی ٹیم کے لیے ایک مضبوط بنیاد قائم کرنے کے مقصد کے تحت کیا ہے۔ پی سی بی کا کہنا ہے کہ ایمرجنگ اور جونیئر کرکٹرز کو عالمی معیار کے مطابق تیار کرنا مستقبل کی قومی ٹیم کے لیے نہایت ضروری ہے، اور اس کے لیے ایسے کھلاڑیوں کی ضرورت ہوتی ہے جنہوں نے نہ صرف عالمی سطح پر کامیابیاں حاصل کی ہوں بلکہ ٹیم کی قیادت کا عملی تجربہ بھی رکھتے ہوں۔
By 
