اگر آپ کے کمپیوٹر یا موبائل پر ایکس، چیٹ جی پی ٹی یا مختلف ویب سائٹس اوپن نہیں ہو رہیں تو پریشان ہونے کی ضرورت نہیں، کیونکہ ایسا مسئلہ صرف آپ تک محدود نہیں ہے۔
دنیا کے متعدد خطوں میں انٹرنیٹ صارفین ایک ہی طرح کی صورتحال کا سامنا کر رہے ہیں اور ہزاروں لوگ مختلف آن لائن سروسز تک رسائی حاصل کرنے سے قاصر ہیں۔
اس وسیع پیمانے پر پیدا ہونے والی خرابی کی بنیادی وجہ کلاؤڈ فلیئر کے سسٹم میں ہونے والی ایک نامعلوم تکنیکی مشکل ہے، جس کے نتیجے میں ایکس سمیت بے شمار ویب سائٹس متاثر ہو گئی ہیں۔
کلاؤڈ فلیئر ایک عالمی سطح کی انٹرنیٹ انفرا اسٹرکچر کمپنی ہے جو کانٹینٹ ڈیلیوری نیٹ ورک (CDN) کے طور پر کام کرتی ہے۔ یہ ویب سائٹس کے مواد کو انتہائی تیزی سے ایک جگہ سے دوسری جگہ منتقل کرنے، سائبر حملوں سے بچانے اور ویب ٹریفک کو منظم کرنے کا اہم کام انجام دیتی ہے۔ تاہم اب اس کے نظام میں اچانک ایک ایسی خرابی پیدا ہوئی ہے جس کے باعث دنیا بھر میں انٹرنیٹ صارفین مختلف ویب سائٹس تک رسائی حاصل نہیں کر پا رہے۔
کلاؤڈ فلیئر کی جانب سے جاری ابتدائی بیان میں کہا گیا ہے کہ کمپنی اس مسئلے سے مکمل طور پر آگاہ ہے اور خرابی کی اصل وجہ جاننے کے لیے ٹیکنیکل ٹیمیں کام کر رہی ہیں۔ کمپنی نے یہ بھی بتایا کہ وہ صورتحال کو جلد از جلد معمول پر لانے کی کوشش کر رہی ہے، تاہم خرابی کی تفصیلات فی الحال سامنے نہیں آ سکیں۔
دوسری جانب ڈاؤن ڈیٹیکٹر کے مطابق کلاؤڈ فلیئر کے سسٹم میں پیدا ہونے والی خرابی کے باعث ایکس کی ٹریفک بھی متاثر ہوئی ہے، جبکہ بے شمار ویب سائٹس مکمل طور پر لوڈ نہیں ہو رہیں۔
جن ویب سائٹس نے جزوی طور پر لوڈ ہونا شروع کیا ہے، ان میں بھی مواد اور تازہ ڈیٹا غائب نظر آ رہا ہے۔ صارفین کی بڑی تعداد کو “انٹرنل سرور ایرر” کا سامنا کرنا پڑ رہا ہے، جو واضح کرتا ہے کہ مسئلہ کلاؤڈ فلیئر کی سروسز کے ساتھ گہرا تعلق رکھتا ہے۔
ابھی تک یہ معلوم نہیں ہو سکا کہ یہ خرابی کب تک برقرار رہ سکتی ہے۔ کلاؤڈ فلیئر نے اس حوالے سے کسی ٹائم فریم کا اعلان نہیں کیا، جس کے باعث صارفین اور ویب ماسٹرز دونوں ہی بے یقینی کی کیفیت سے دوچار ہیں۔ دنیا بھر میں لاکھوں انٹرنیٹ صارفین اس تکنیکی مسئلے کے حل ہونے کے منتظر ہیں، جبکہ کمپنی کی جانب سے مزید معلومات کا انتظار کیا جا رہا ہے۔
By 
