By پنجاب میں ٹریفک قوانین کی خلاف ورزی پر تقریباً 50 ہزار گاڑیوں کو بھاری جرمانے عائد کیے جا چکے ہیں۔
تفصیلات کے مطابق ڈی آئی جی ٹریفک پنجاب محمد وقاص نذیر نے اتوار کے روز دھواں چھوڑنے والی گاڑیوں کے خلاف سخت کارروائی کا حکم دیا جس کے بعد اس ماہ صوبے بھر میں بھرپور مہم جاری ہے۔
اب تک 48,400 سے زائد گاڑیوں کو اخراج (ایمیشن) قواعد کی خلاف ورزی پر چالان کیا جا چکا ہے۔ حکام نے 10 گاڑیوں کے فٹنس سرٹیفکیٹ معطل کر دیے ہیں جبکہ بار بار خلاف ورزی کرنے والی 16 سے زیادہ گاڑیوں کے روٹ پرمٹ بھی منسوخ کیے جا چکے ہیں۔
ٹریفک پولیس حکام کے مطابق، زائد دھواں چھوڑنے والی گاڑیوں پر اب تک 9 کروڑ 70 لاکھ روپے سے زائد کے جرمانے عائد کیے جا چکے ہیں جو گزشتہ سال کی اسی مدت کے مقابلے میں 85 فیصد زیادہ ہیں۔
مزید پڑھیں: پنجاب حکومت نے ٹریفک قوانین کی خلاف ورزیوں پر بھاری جرمانے نافذ کر دیے
پولیس نے مزید بتایا کہ ماحولیاتی اور ٹریفک قوانین کی سنگین خلاف ورزیوں پر سات ایف آئی آر بھی درج کی گئی ہیں۔
جاری مہم کے دوران اہلکاروں نے 7,700 سے زائد گاڑیوں کو چیک کیا جبکہ مٹی اور ریت لے جانے والی 2,100 سے زیادہ اون کارڈ ٹرالیاں بھی سڑکوں پر آلودگی پھیلانے پر جرمانہ ہوئیں۔ حکام نے مزید کہا کہ جو بھی گاڑی دھواں خارج کرے گی اسے 2,000 روپے جرمانہ کیا جائے گا اور ممکنہ طور پر اضافی قانونی کارروائی بھی ہو سکتی ہے۔
دوسری جانب پنجاب حکومت نے موٹر وہیکل ایکٹ میں ترمیم کرتے ہوئے 8بڑی ٹریفک خلاف ورزیوں پر بھاری جرمانے عائد کر دیے ہیں تاکہ صوبے میں ٹریفک قوانین پر سختی سے عمل درآمد اور سڑکوں پر نظم و ضبط کو یقینی بنایا جا سکے۔
ترمیم شدہ ضوابط کے مطابق، فضائی آلودگی یا دھواں چھوڑنے والی گاڑیوں کے مالکان پر بھاری جرمانے عائد کیے جائیں گے، موٹر سائیکلوں کے لیے 5 ہزار روپے، کاروں اور جیپوں کے لیے 10 ہزار روپے، پبلک سروس وہیکلز کے لیے 15 ہزار روپے اور ہیوی ٹرانسپورٹ وہیکلز کے لیے 20 ہزار روپے جرمانہ مقرر کیا گیا ہے۔
یہ بھی پڑھیں: موٹر سائیکل سواروں کے لیے بُری خبر، قانون کی خلاف ورزی پر ہوش اڑا دینے والے جرمانہ کا اعلان
