اسٹاک ایکسچینج میں تیزی کا رجحان ، ڈالر بھی سستا

پاکستان اسٹاک ایکسچینج میں کاروباری ہفتے کے تیسرے روز بھی مثبت رجحان دیکھا گیا، جس کے نتیجے میں مارکیٹ نے ایک بار پھر مضبوط آغاز کیا۔

 ٹریڈنگ کے ابتدائی لمحات میں سرمایہ کاروں کی دلچسپی میں اضافہ دیکھنے میں آیا، جس کے باعث 100 انڈیکس میں 590 پوائنٹس کا نمایاں اضافہ ریکارڈ کیا گیا، اس اضافے کے بعد انڈیکس دوبارہ بڑھتے ہوئے 1 لاکھ 61 ہزار 526 پوائنٹس کی سطح تک پہنچ گیا، جو مارکیٹ میں سرمایہ کاروں کے اعتماد کی بحالی کی علامت ہے۔

گزشتہ روز بھی اسٹاک مارکیٹ نے کاروباری سرگرمیوں کا آغاز تیزی کے ساتھ کیا تھا اور ابتدائی سیشن میں انڈیکس ایک موقع پر 1 لاکھ 62 ہزار پوائنٹس کی حد بھی عبور کر گیا تھا۔ تاہم دن کے اختتام تک منافع کا دباؤ بڑھنے کی وجہ سے مارکیٹ منفی زون میں بند ہوئی۔

 تجزیہ کاروں کے مطابق عالمی مارکیٹوں کے رجحان، سیاسی استحکام اور معاشی اعداد و شمار کے اثرات کے باعث سرمایہ کاروں کا رویہ مسلسل اتار چڑھاؤ کا شکار ہے۔

یہ بھی پڑھیں:پاکستان اسٹاک ایکسچینج نےکاروبارشروع ہوتے ہی نئی تاریخ رقم کردی

اس کے باوجود آج مارکیٹ کا مثبت آغاز معاشی اشاریوں میں بہتری، سرمایہ کاروں کے بڑھتے اعتماد اور غیر یقینی صورتحال میں کمی کی جانب اشارہ کرتا ہے۔

 ماہرین کا کہنا ہے کہ اگر یہی رجحان برقرار رہتا ہے تو آنے والے دنوں میں انڈیکس مزید بہتری کی طرف بڑھ سکتا ہے۔

دوسری جانب کرنسی مارکیٹ میں بھی ہلکی مثبت پیش رفت دیکھنے کو ملی  ہے جہاں  روپے کے مقابلے میں امریکی ڈالر معمولی سستا ہو گیا۔

ایکسچینج کمپنیز ایسوسی ایشن کے مطابق انٹر بینک مارکیٹ میں ڈالر کی قدر میں 2 پیسے کی کمی ریکارڈ کی گئی، جس کے بعد ڈالر کی نئی قیمت 280 روپے 65 پیسے ہو گئی ہے۔

 ماہرین کے مطابق اگر درآمدی دباؤ کم ہوا اور ترسیلات بڑھیں تو روپے کی قدر مزید مستحکم ہونے کی امید ہے، مجموعی طور پر اسٹاک مارکیٹ اور زرمبادلہ مارکیٹ دونوں میں آج کی ٹریڈنگ سرمایہ کاروں کے لیے حوصلہ افزا رہی۔