کراچی کو ملنے والا ہے دنیا کا کونسا بڑا اعزاز ، اقوام متحدہ کی پیشگوئی

کراچی کو عالمی سطح پر ایک بڑا اعزاز ملنے والا ہے، جس کو اقوام متحدہ کی تازہ رپورٹ ’ورلڈ اربنائزیشن پروسپیکٹس 2025‘ میں کیا گیا ہے۔

 رپورٹ کے مطابق کراچی تیزی سے پھیلتی ہوئی آبادی اور شہری توسیع کے باعث آنے والے سالوں میں دنیا کے بڑے شہروں کی فہرست میں نمایاں مقام حاصل کرلے گا۔

 اقوام متحدہ کا کہنا ہے کہ 2025ء سے 2030ء کے درمیان کراچی دنیا کے ٹاپ ٹین میگا سٹیز میں شامل ہو جائے گا، جبکہ 2050ء تک شہر کی آبادی تقریباً 3 کروڑ 30 لاکھ تک پہنچنے کا امکان ہے، جس کے بعد کراچی دنیا کے پانچ سب سے بڑے شہروں میں شمار ہوگا۔

رپورٹ میں یہ بھی بتایا گیا ہے کہ کراچی کی بڑھتی ہوئی آبادی اسے قاہرہ، ٹوکیو، گوانگزو، منیلا اور کولکتہ جیسے بڑے شہروں سے بھی آگے لے جا سکتی ہے۔

یہ بھی پڑھیں: پاکستانی طلباء کیلئے بڑی خوشخبری، امریکہ میں مفت تعلیم کا زبردست موقع

 اقوام متحدہ کے مطابق 1975ء میں دنیا بھر میں صرف 8 بڑے شہر تھے، جو 2025ء میں بڑھ کر 33 ہو چکے ہیں، جن میں سے 19 ایشیائی ممالک میں واقع ہیں۔ مزید پیشگوئی کی گئی ہے کہ 2050ء تک یہ تعداد 37 تک ہو جائے گی۔

عالمی اعدادوشمار کے مطابق صدی کے وسط تک ڈھاکا دنیا کا سب سے بڑا شہر بننے کی دوڑ میں سب سے آگے ہے، جبکہ ٹوکیو کی آبادی میں کمی کے باعث اس کی عالمی درجہ بندی نیچے آنے کا امکان ہے اور 2050ء تک وہ ساتویں نمبر پر پہنچ سکتا ہے۔

رپورٹ میں کراچی کی گنجان آبادی پر خصوصی توجہ دیتے ہوئے بتایا گیا ہے کہ شہر میں آبادی کا دباؤ 25 ہزار افراد فی مربع کلومیٹر تک پہنچ چکا ہے، جو دنیا کے انتہائی گنجان آباد شہروں کے برابر ہے۔

اقوام متحدہ کے مطابق دنیا تیزی سے شہری طرزِ زندگی کی طرف بڑھ رہی ہے،  1950ء میں عالمی آبادی کا صرف 20 فیصد شہروں میں رہتا تھا، جو آج بڑھ کر 45 فیصد ہو چکا ہے۔

 2000ء سے 2025ء تک شہری آبادی میں 1.25 ارب افراد کا اضافہ ہوا، جس میں بھارت، چین، نائیجیریا، پاکستان اور امریکا کا حصہ 50 کروڑ سے زیادہ ہے۔

رپورٹ کے مطابق 2040ء کی دہائی میں عالمی دیہی آبادی اپنی بلند ترین سطح پر پہنچنے کے بعد کمی کا شکار ہونا شروع ہو جائے گی، جبکہ چین اور بھارت مستقبل میں بھی دنیا کی سب سے بڑی شہری آبادی کے حامل ممالک رہیں گے۔