کل کا دن در اصل 9 مئی ٹو تھا: مریم اورنگزیب

سینیئرصوباٸی وزیر پنجاب مریم اورنگزیب نے کہا ہے کہ کل کا دن در اصل 9 مئی ٹو تھا، کل نشانہ جمہوری ادارے تھے اور مقصد شنگھائی کانفرنس ملتوی کروانا اور عدلیہ پر قبضہ کرنا تھا۔ 

ایک بیان میں انہوں نے کہا کہ زخمی کا نسٹیبل عبدالحمید پمز میں دم توڑ کر شہید ہو گئے، اس کا ذمہ دار 9  مئی کا مجرم ہے، جو ایک بے شرم نارسسٹ اور فاشسٹ شخص ہے۔

انہوں نے مزید کہا کہ  خیبر پختونخوا  سے گنڈا پور کو اسلحہ دے کر آنسو گیس کے شیل ، شیشے والی غلیلیں دے کر لاشیں گرانے ، خون خرابہ کرنے، گولیاں چلانے اسلام آباد پر چڑھائی کروانے عمران خان نےبھجوایا، پولیس، رینجرز پر حملے کرائے سر اور آنکھیں پھوڑی گئیں، کل کا دن در اصل 9 مئی ٹو تھا۔

یہ بھی پڑھیں:پی ٹی آئی قیادت و کارکنان پر لاہور میں بغاوت کا مقدمہ درج

مریم اورنگزیب نے کہا کہ 9  مئی کو نشانہ قومی سلامتی کے ادارے تھے اور مقصد ادارے کی سربراہی پر قبضہ کروانا تھا، کل نشانہ جمہوری ادارے تھے اور مقصد شنگھائی کانفرنس ملتوی کروانا اور عدلیہ پر قبضہ  کرنا تھا۔

سینیئر صوبائی وزیر کاکہنا تھا کہ دونوں سازشوں کا خالق ایک ہی فرد ہے کیونکہ فتنے کو معلوم ہوچکا ہے کہ خارجہ تعلقات درست راہ پر آگئے ہیں، معیشت پھر پٹڑی پر واپس آگئی ہے اور اس کی فتنہ سیاست ختم ہو چکی ہے۔

مریم اورنگزیب نے مزید کہا کہ جو جو ملک کے خلاف اِس ملک دشمن سازش کا حصہ بن رہے ہیں وہ سب پاکستان کے اور قوم کے مجرم ہیں۔