اسلام آباد: سپریم کورٹ کے آئینی بینچ نے پی ٹی آئی کے احتجاج کے دوران ہونے والی ہلاکتوں پر از خود نوٹس لینے کی استدعا مسترد کردی۔
آئینی بینچ کی سربراہی جسٹس امین الدین خان نے کی، جس میں جسٹس مسرت ہلالی اور جسٹس جمال خان مندوخیل بھی شامل تھے۔
آج موسمیاتی تبدیلی اتھارٹی سے متعلق کیس کی سماعت کے دوران خیبر پختونخوا حکومت کے ایڈیشنل ایڈووکیٹ جنرل ویڈیو لنک کے ذریعے پیش ہوئے اور کہا کہ گزشتہ روز پی ٹی آئی کے احتجاج کے دوران دونوں اطراف سے ہلاکتیں ہوئیں۔
انہوں نے درخواست کی کہ سپریم کورٹ اس معاملے پر از خود نوٹس لے۔
اس پر جسٹس مسرت ہلالی نے ریمارکس دیئے کہ سپریم کورٹ میں آ کر سیاسی باتیں نہ کی جائیں، اسی طرح جسٹس امین الدین خان نے واضح کیا کہ جو معاملہ ان کے سامنے نہیں ہے، وہ اس پر غور نہیں کر سکتے۔ جسٹس جمال خان مندوخیل نے بھی کہا کہ یہ معاملہ ہمارے سامنے نہیں ہے اور ہم اس پر بات نہیں کرنا چاہتے
آئینی بینچ نے واضح کرتے ہوئے ایڈیشنل ایڈووکیٹ جنرل کی زبانی استدعا مسترد کردی اورعدالت کی توجہ صرف اس کیس کی سماعت تک محدود رکھی۔
By 
